Gjermania ashpërson politikat e migracionit dhe shtetësisë

Gjermania po përgatitet të ashpërsojë ndjeshëm politikat e saj për migracionin dhe marrjen e shtetësisë, në përpjekje për të frenuar migrimin e paligjshëm dhe për të forcuar sigurinë kombëtare.

Sipas mediave gjermane, autoritetet po shqyrtojnë masa më të rrepta kufitare, ndërsa paralelisht po planifikohen edhe kushte më strikte për fitimin e shtetësisë gjermane. Një nga propozimet më të diskutuara parashikon mundësinë e heqjes së shtetësisë për personat që tashmë janë shtetas gjermanë dhe që bëjnë thirrje publike për krijimin e një kalifati ose për vendosjen e ligjit të Sheriatit. E njëjta masë do të zbatohej edhe ndaj shtetasve të huaj ose personave me shtetësi të dyfishtë të dënuar për krime antisemite, raporton portali Fenix-magazin.de.

Në të njëjtën kohë, Zyra e CDU-së në Bruksel po përgatit një rezolutë që pritet të diskutohet në konferencën e ardhshme të partisë në Stuttgart. Sipas këtij propozimi, azilkërkuesit që hyjnë në Bashkimin Evropian nga vende të treta të sigurta do të kthehen menjëherë në kufijtë e jashtëm të BE-së, pa kaluar nëpër procedura të gjata azili apo kontrolle shtesë.

Dokumenti, i cili është parë nga mediat gjermane, thekson se zbatimi i kësaj praktike kërkon rregullore ligjërisht të detyrueshme në nivel të Bashkimit Evropian. Kthimi i emigrantëve të paligjshëm do të rregullohej përmes një protokolli shtesë të Konventës Evropiane për të Drejtat e Njeriut.

Propozuesit argumentojnë se këto masa synojnë të kapërcejnë jurisprudencën aktuale të lidhur me Konventën Evropiane për të Drejtat e Njeriut, e cila, sipas tyre, aktualisht pengon zbatimin efektiv të masave për mbrojtjen e kufijve të jashtëm të BE-së.

Gjithashtu, planifikohet shtrëngim i ndjeshëm i kushteve për marrjen e shtetësisë gjermane. Kandidatët do të duhet të dëshmojnë njohuri të avancuara të gjuhës gjermane, të kenë jetuar pa ndihmë sociale për të paktën pesë vjet, të kenë qenë rezidentë të ligjshëm për së paku shtatë vjet dhe të mos kenë precedentë penalë.

Njohja e gjuhës do të verifikohet jo vetëm përmes certifikatave zyrtare, por edhe përmes një testi shtesë me gojë, me qëllim parandalimin e abuzimeve dhe përdorimit të certifikatave të falsifikuara.

Sipas mediave, propozimi parashikon gjithashtu që personat, kërkesat e të cilëve për azil janë refuzuar, si dhe refugjatët nga vendet ku luftërat civile kanë përfunduar, të humbasin përgjithmonë të drejtën për të qëndruar në Gjermani.

Flaka