Estonia hap “rrugën e akullt” 20 km mbi detin e ngrirë për të lidhur dy ishuj

Temperaturat ekstreme në Evropën Veriore kanë bërë që deti midis dy ishujve kryesorë të Estonisë të ngrijë plotësisht, duke mundësuar hapjen e një “rruge akulli” prej 20 kilometrash për automjetet.

Rruga që lidh ishujt Saaremaa dhe Hiiumaa, të vendosur në perëndim të Estonisë mes Detit Baltik dhe Gjirit të Rigës, u hap zyrtarisht të dielën. Qindra drejtues mjetesh prisnin në radhë për ta përdorur këtë korridor të pazakontë mbi detin e ngrirë.

Autoritetet vendosën ta hapin rrugën pasi shumë banorë kishin nisur spontanisht ta kalonin detin e ngrirë, duke rrezikuar jetën. Tragetet kishin vështirësi në operim për shkak të temperaturave që për javë të tëra ranë deri në minus 10 gradë Celsius.

Një domosdoshmëri, por edhe traditë

Banorët e Hiiumaa-s, ishull me rreth 9,000 banorë, udhëtojnë shpesh drejt Saaremaa-s, ku jetojnë 31,000 persona, për pazar, shkollë apo shërbime të tjera. Lidhja me Saaremaa-n siguron gjithashtu akses drejt Estonisë kontinentale.

Kryetari i bashkisë së Hiiumaa, Hergo Tasuja, e quajti rrugën e akullt “pjesë të kulturës sonë”, duke theksuar se për breza me radhë banorët e zonës kanë lundruar në verë dhe kanë kaluar mbi akull në dimër.

Rregulla strikte sigurie

Rruga është një korridor i shënuar mbi akullin e detit, ku specialistët kanë verifikuar trashësinë e mjaftueshme për të përballuar peshën e automjeteve.

Punëtorët matin trashësinë e akullit çdo 100 metra dhe kërkohet minimumi 24 centimetra për siguri. Kushtet monitorohen 24 orë në ditë dhe rruga përshtatet sipas ndryshimeve të motit.

Automjetet nuk duhet të peshojnë më shumë se 2.5 ton. Ato duhet të lëvizin ose nën 20 km/h, ose midis 40 dhe 70 km/h, pasi shpejtësitë e ndërmjetme mund të krijojnë dridhje të rrezikshme për akullin. Ndalohet ndalimi gjatë rrugës dhe kërkohet distancë e sigurt mes mjeteve. Për arsye sigurie, pasagjerët nuk duhet të vendosin rripat e sigurimit dhe dyert duhet të jenë lehtësisht të hapshme në rast emergjence.

Sipas autoriteteve, një rrugë e tillë u përdor për herë të fundit rreth tetë vite më parë, pasi dimrat e fundit kanë qenë më të ngrohtë. Ndërkohë, kompania përgjegjëse ka njoftuar se do të hapen edhe dy rrugë të tjera akulli që lidhin Estoninë kontinentale me ishuj më të vegjël.

Flaka