Aksionet e Samsung rriten 77% këtë vit, investitorët optimistë për çipat AI

Aksionet e Samsung Electronics kanë shënuar një rekord të ri të të gjitha kohërave, duke u rritur me 6.1% në bursën e Koresë së Jugut dhe duke e çuar kapitalizimin e tregut të kompanisë në rreth 620 trilionë KRW (433.7 miliardë USD).

Kjo rritje përfaqëson një 77% fitim vetëm gjatë këtij viti, duke e vendosur gjigantin korean në qendër të vëmendjes së investitorëve globalë. Arsyeja kryesore është optimismi për kërkesën në rritje të çipave të memories DRAM dhe NAND, të cilët janë thelbësorë për platformat e reja të Inteligjencës Artificiale.

Analistët theksojnë se mungesat e përkohshme të furnizimit mund të çojnë në çmime më të larta dhe fitime më të mëdha për Samsung. Për më tepër, kompania raportohet se është në negociata të avancuara me Nvidia për furnizimin e memories me brez të gjerë (HBM), një komponent kyç për serverët dhe platformat AI.

Sipas analistit amerikan Haris Khurshid, ky është “momentin i Inteligjencës Artificiale për Samsung”, duke reflektuar jo vetëm fuqinë teknologjike të kompanisë, por edhe besimin e investitorëve në aftësinë e saj për të udhëhequr epokën e re të AI-së.

Samsung ka investuar miliarda dollarë në qendra të reja prodhimi dhe zgjidhje AI, duke synuar të forcojë pozitën e saj kundrejt rivalëve si SK Hynix dhe të bëhet furnizues kryesor për gjigantët globalë të teknologjisë.

Ekspertët presin që aksionet e Samsung të vazhdojnë trendin pozitiv në tremujorët e ardhshëm, për sa kohë që kërkesa për çipat e AI-së mbetet e lartë dhe oferta nuk bie nën presionin e mungesave.

Flaka