Apple mbyll aplikacionin Clips pas 8 vitesh

Pas tetë vitesh në treg, Apple ka vendosur të mbyllë aplikacionin e saj për editim video, Clips, i cili u lançua në vitin 2017 si një mjet i thjeshtë dhe argëtues për krijimin e videove të shkurtra me muzikë, tekst, filtra dhe efekte AR.

Në fillimet e tij, Clips u pa si një alternativë e lehtë ndaj aplikacioneve më të avancuara si iMovie, duke synuar përdoruesit e rinj dhe krijuesit e përmbajtjes për rrjetet sociale. Apple shtoi me kalimin e viteve funksione si Memoji, Animoji dhe mbështetje për LiDAR, por përditësimet u rralluan ndjeshëm vitet e fundit.

Sipas një njoftimi në faqen zyrtare të Apple, aplikacioni nuk do të përditësohet më dhe nuk është më i qasshëm për shkarkim për përdoruesit e rinj që nga 10 tetori 2025. Megjithatë, ata që e kanë shkarkuar tashmë mund të vazhdojnë ta përdorin në versionet aktuale të iOS dhe iPadOS.

Apple këshillon përdoruesit që të ruajnë videot e krijuara me Clips direkt në Photos, për të siguruar që ato të mos humbasin në rast të përditësimeve të ardhshme të sistemit operativ. Për krijimin e videove të reja, kompania sugjeron përdorimin e iMovie ose aplikacioneve të palëve të treta si InShot, VN Video Editor apo GoPro Quik.

Ky vendim shënon fundin e një aplikacioni që, ndonëse inovativ në fillim, nuk arriti të fitonte popullaritetin e pritur dhe mbeti në hije nga platformat e tjera të fuqishme të krijimit të përmbajtjes.

Flaka