ASH: Dibra vazhdon të degradohet nga ky pushtet

Dibra po përjeton një shkatërrim të qëllimshëm institucional përmes Ministrisë së Punëve të Brendshme. Me sistematizimin e ri, pushteti po e çmonton me vetëdije pikën kufitare të Bllatës, duke ia hequr Dibrës kontrollin mbi kufirin me Republikën e Shqipërisë dhe duke ia deleguar këtë kompetencë Stacionit Policor të Kërçovës.

Nga tre seksione të parapara për Qendrën Rajonale Perëndimore, njëri ishte planifikuar të vendosej në Dibër. Ky vendim është anuluar qëllimisht dhe seksioni po zhvendoset në Kërçovë, me synimin që prej andej të mbulohet e gjithë linja kufitare me Shqipërinë për Rrethin e Dibrës.

Kufiri ndërmjet Rrethit të Dibrës dhe Republikës së Shqipërisë është 47 kilometra. Është absurde dhe e papranueshme të pretendohet se një linjë kufitare me terren të vështirë dhe rëndësi strategjike mund të kontrollohet nga një qytet tjetër, dhjetëra kilometra larg.

Ky vendim rrezikon drejtpërdrejt sigurinë kufitare dhe e zhvesh Dibrën nga kompetencat e saj legjitime.

Dje u çmontua stacioni policor, për të cilin u mburrën në Kuvend. Sot po çmontohet edhe pika kufitare.

Kjo është një tjetër dëshmi se VMRO, përmes vasalëve të saj në VLEN, po vazhdon politikën e vjetër të zhbërjes së institucioneve shqiptare, duke e trajtuar Dibrën si territor periferik, pa zë dhe pa përfaqësim.

Kjo nuk është reformë. Kjo është diskriminim institucional i hapur.

Ne nuk do ta pranojmë këtë padrejtësi. Dibra meriton institucione funksionale, siguri reale dhe trajtim të barabartë. Çdo tentativë për ta dobësuar Dibrën do të kundërshtohet fuqishëm, publikisht dhe pa kompromis, në të gjitha instancat, thanë nga Aleanca për Shqiptarët. Gazeta Flaka