ASHMAA kërkon të respektohen standardet profesionale dhe etike gjatë ceremonisë mortore

Agjencia për Shërbime Mediatike Audio dhe Audiovizuele (ASHMAA) rikujton mediat që kur raportojnë për varrimin e viktimave të zjarrit tragjik në Koçan, t’u përmbahen standardeve më të larta profesionale dhe etike.

Nga ASHMAA thonë se raportimi duhet të jetë pa sensacionalizëm.

“Është e domosdoshme të respektohet dhimbja dhe pikëllimi personal i familjeve, të afërmve dhe të dashurve të të vdekurve dhe duhet pasur kujdes që të mos kontribuohet në rritjen e mëtejshme të ankthit. Në këtë drejtim janë edhe kërkesat e banorëve të Koçanit të cilët dje i janë drejtuar drejtpërdrejt Agjencisë, por edhe përmes rrjeteve sociale, me apel për punonjësit e mediave që të qëndrojnë larg funeralit dhe të mos filmojnë me dronë. Mediat duhet të jenë të kujdesshme gjatë realizimit dhe sidomos në publikimin e regjistrimeve dhe fotografive, në mënyrë që familjet dhe prindërit t’i thonë lamtumirë të dashurit me dinjitet dhe respekt”, thonë nga ASHMAA.

Organi rregullator vlerëson se në përgjithësi mediat këto ditë kanë demonstruar nivel të lartë profesionalizmi.

“Janë regjistruar disa raste të transmetimit të filmave dhe serialeve me përmbajtje argëtuese, për të cilat janë parashtruar ankesa në Agjenci, për këtë arsye transmetuesit këshillohen që të kenë më shumë kujdes gjatë krijimit të orarit të tyre programor. Njëkohësisht theksojnë se është e rëndësishme që muzika klasike që transmetohet të jetë e përshtatshme për ditë zie. ASHMAA gjithashtu apelon tek mediat që të ofrojnë mbështetjen e nevojshme për punonjësit e tyre mediatik, të cilët ditët e fundit janë ekspozuar ndaj stresit të jashtëzakonshëm dhe rrjedhimisht rrezikut shëndetësor gjatë kryerjes së detyrës”.

“Agjencia paraprakisht ka dërguar një njoftim për mediat për të harmonizuar punën e tyre me ditët e zisë të shpallura nga Qeveria për shkak të tragjedisë në Koçan. Ai tregoi se duhet të transmetohen/publikohen përmbajtje që për nga funksioni mediatik i korrespondojnë ditëve të zisë. Muzika duhet të jetë nga zhanre muzikore të përshtatshme për ditë zie dhe transmetimi i emisioneve argëtuese, humoristike apo programeve me tematikë humori duhet të shtyhet deri në përfundimin e tyre. Transmetimi i reklamave, pra të gjitha format e komunikimeve komerciale, gjithashtu duhet të shtyhet deri në fund të ditëve të zisë. Në ditët e zisë, transmetuesit përjashtohen nga detyrimi për të transmetuar një përqindje të caktuar të muzikës vendase”, thonë nga ASHMAA.