BE vendos dritat e reja të frenave për të gjitha makinat e reja nga korriku

Nga 7 korriku i këtij viti, të gjitha makinat e reja në Bashkimin Evropian do të jenë të pajisura me një dritë të re frenash, e cila do të sinjalizojë frenimin e fortë dhe do të paralajmërojë përdoruesit e tjerë të rrugës për rrezikun e mundshëm. Qëllimi është të zvogëlohet rreziku i përplasjes me automjetet që ngadalësojnë papritur.

Sipas rregullores së BE-së për sigurinë e përgjithshme të automjeteve, sistemi i ri përfshin:

• Dritën e frenave që ndizet automatikisht gjatë ngadalësimit të fortë, zakonisht mbi 50 km/orë.
• Aktivizimin automatik të sinjaleve të kthesës pas një ndalese të menjëhershme.
• Në rast të frenimit emergjent, dritat e paralajmërimit do të pulsojnë disa herë për të sinjalizuar rrezikun.

Ky sistem i quajtur frenim adaptiv emergjent zbatohet vetëm për makinat e reja të pasagjerëve dhe automjetet e lehta tregtare, ndërsa automjetet ekzistuese nuk janë të detyruara të modifikohen. Pa këtë pajisje, homologimi i automjetit nuk do të jetë i mundur pas datës së specifikuar.

Rregullorja është pjesë e një pakete më të gjerë masash për rrugë më të sigurta, të përfshira në Rregulloren e BE-së 2019/2144, që përfshin sisteme të avancuara si: frenimi emergjent automat (AEBS), asistenca për mbajtjen e korsisë, kufizues inteligjent shpejtësie, zbulimi i përgjumjes së shoferit dhe kamera e pasme.

Ky ndryshim synon të përmirësojë sigurinë e automjeteve dhe të ulë aksidentet rrugore në të gjithë Bashkimin Evropian.

Flaka