BMW ndal disa linja prodhimi në Evropë, mungesa e pjesëve prek tri fabrika

Problemet në zinxhirin e furnizimit kanë detyruar prodhuesin gjerman të automobilave të anulojë disa ndërrime pune në Gjermani dhe Britani të Madhe. Preken fabrikat në Regensburg, Leipzig dhe Oxford.

Prodhuesi gjerman i automobilave BMW ka anuluar disa ndërrime pune në fabrikat e tij evropiane për shkak të mungesës së pjesëve nga furnizuesit e jashtëm.

Problemet kanë prekur tri njësi prodhuese: fabrikat në Regensburg dhe Leipzig të Gjermanisë, si dhe atë në Oxford të Britanisë së Madhe.

„Për shkak të problemeve afatshkurtra në furnizimin e jashtëm me pjesë në disa fabrika të BMW Group, ndërrimet e punës janë anuluar ose po anulohen“, konfirmoi një zëdhënës i kompanisë.

BMW nuk ka bërë të ditur se për cilat pjesë konkrete bëhet fjalë dhe as çfarë i ka shkaktuar vështirësitë në furnizim.

Qindra automjete më pak nga një ndërrim pune

Kompania njoftoi se është në komunikim të vazhdueshëm me furnizuesit dhe po ndërmerr masa për stabilizimin e zinxhirit të furnizimit dhe rikthimin e prodhimit në ritmin e zakonshëm.

Për momentin nuk dihet se sa automjete nuk do të prodhohen si pasojë e anulimit të ndërrimeve të punës.

Megjithatë, bëhet fjalë për fabrika me kapacitete të konsiderueshme prodhuese. Gjatë vitit të kaluar, BMW prodhoi afro 357.000 automjete në Regensburg, rreth 260.000 në Leipzig dhe afërsisht 124.000 në Oxford.

Anulimi i vetëm një ndërrimi pune në njërën prej këtyre fabrikave mund të nënkuptojë qindra automjete më pak. Megjithatë, prodhuesit shpesh arrijnë t’i kompensojnë humbjet afatshkurtra përmes organizimit të ndërrimeve shtesë në ditët pasuese.

Probleme të ngjashme edhe te Stellantis

BMW nuk është prodhuesi i vetëm evropian që po përballet me vështirësi në zinxhirin e furnizimit.

Në fillim të nëntorit, grupi Stellantis pezulloi përkohësisht një pjesë të prodhimit të automjeteve Fiat në Itali, për shkak të mungesës së një komponenti elektronik që përdoret në njësitë e kontrollit të motorit.

Problemi ndikoi në prodhimin në disa njësi italiane, ndërsa kompania paralajmëroi se vështirësitë në furnizim mund të vazhdojnë edhe gjatë nëntorit dhe dhjetorit.

Në fabrikën Mirafiori në Torino, prodhimi ishte ndërprerë edhe gjatë tetorit për shkak të mungesës së pjesëve për modelet hibride.

Ndryshe nga Stellantis, BMW ende nuk ka sqaruar nëse vështirësitë aktuale lidhen me mungesën e gjysmëpërçuesve apo me ndonjë komponent tjetër.

Kompania gjithashtu nuk ka dhënë një afat se kur pritet të normalizohet plotësisht furnizimi dhe të rikthehen të gjitha ndërrimet e punës.

Gazeta Flaka

• 
• 
• 
• 
• 
• 
• 

32

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

24

Jo, nuk mendoj.

7

Nuk ka arsye për të protestuar.

1