“Bordi i Paqes” për Gazën, Trump mbledh mbi 45 vende në Uashington

Presidenti i Shteteve të Bashkuara, Donald Trump, do të udhëheqë sot në Uashington mbledhjen e parë të një strukture të re ndërkombëtare të quajtur “Bordi i Paqes”, e krijuar me synimin për të adresuar krizën dhe të ardhmen politike të Rripi i Gazës, raportoi Reuters.

Takimi pritet të mbledhë përfaqësues nga mbi 45 vende, si dhe nga Bashkimi Evropian, në një përpjekje për të koordinuar hapat drejt stabilizimit të rajonit, ndërsa shumë çështje kyçe mbeten ende të pazgjidhura.

Në rendin e ditës përfshihen tema të ndjeshme si çarmatimi i Hamasi, përcaktimi i madhësisë së fondit për rindërtimin e Gazës dhe mekanizmat për shpërndarjen e ndihmës humanitare për popullsinë e prekur nga lufta.

Sipas zyrtarëve amerikanë, vendet pjesëmarrëse kanë premtuar rreth 5 miliardë dollarë për fondin e rindërtimit, një shumë që konsiderohet vetëm si fillim, përballë nevojave shumë më të mëdha në terren. Brenda kësaj pakete përfshihen edhe rreth 1,2 miliardë dollarë kontribute nga Emiratet e Bashkuara Arabe dhe Kuvajti.

Takimi zhvillohet në objektin e ri të riemërtuar “Donald J. Trump U.S. Institute of Peace”, i cili sipas administratës amerikane do të shërbejë si platformë për diskutimin e një plani më të gjerë paqeje.

Megjithatë, iniciativa ka ngjallur kritika ndërkombëtare, pasi në përbërjen e Bordit përfshihet Izraeli, ndërsa mungojnë përfaqësues palestinezë. Kritikët paralajmërojnë se kjo qasje mund të dobësojë rolin e Organizata e Kombeve të Bashkuara si instanca kryesore për ndërmjetësimin e konflikteve.

Po ashtu, pritet që Trump të njoftojë për një plan paraprak për dërgimin e mijëra trupave ndërkombëtare në një forcë stabilizimi për Gazën. Megjithatë, vendosja e tyre do të kushtëzohet nga çarmatimi i Hamasit, një nga pikat më të debatueshme të procesit.

Ndërkohë, disa anëtarë të përhershëm të Këshillit të Sigurimit të OKB-së – si Franca, Mbretëria e Bashkuar, Rusia dhe Kina – pritet të mos marrin pjesë në këtë takim, çka mund të ndikojë në peshën diplomatike të iniciativës.

Flaka