Bujar Osmani dhe Arta Bilalli Zendeli demantojnë listën e publikuar: Paralajmërojnë padi për shpifje
Bujar Osmani dhe Arta Bilalli Zendeli, funksionarë të Bashkimit Demokratik për Integrim (BDI), kanë reaguar pas publikimit të një liste në disa portale, në të cilën pretendohet se figurojnë emrat e tyre si përfitues të pagave apo honorarëve nga partia. Të dy i kanë mohuar kategorikisht këto pretendime, duke paralajmëruar edhe masa ligjore ndaj mediave që kanë publikuar informacionin.
Ish-ministri dhe funksionari i BDI-së, Bujar Osmani, ka deklaruar se gjatë 20 viteve të angazhimit të tij politik në këtë parti nuk ka marrë asnjë pagesë.
“E përgënjeshtroj kategorikisht këtë informacion të pavërtetë! Në 20 vite angazhim politik në BDI, nuk kam marrë asnjëherë, as edhe një denar të vetëm nga partia. As pagë, as kompensim, as honorar!”, ka shkruar Osmani.
“Në të kundërtën, do të shfrytëzoj të gjitha mjetet ligjore për mbrojtjen e reputacionit dhe dinjitetit tim”, ka paralajmëruar Osmani, duke shtuar se “VLEN është shndërruar në kërcënim hibrid”.
Reagim ka pasur edhe nga nënkryetarja dhe zëdhënësja e BDI-së, Arta Bilalli Zendeli, e cila gjithashtu ka mohuar se ka përfituar pagë apo honorar nga partia.
“Unë, Arta Bilalli Zendeli, nënkryetare dhe zëdhënëse e Bashkimit Demokratik për Integrim, në asnjë moment nuk kam marrë pagë ose honorar tjetër nga partia”, ka deklaruar ajo.
Bilalli Zendeli ka paralajmëruar padi për shpifje ndaj portaleve që kanë publikuar emrin e saj.
“Të gjitha portalet që sot e kanë publikuar emrin tim, së shpejti do ta pranojnë padinë për shpifje dhe procesi më tej do të vazhdojë në gjykatë, sipas procedurës përkatëse!”, ka theksuar ajo.
Në reagimin e saj, Bilalli Zendeli ka shtuar se angazhimi politik për të nuk lidhet me përfitime financiare.
“Misioni, ideali dhe sakrifica nuk shpaguhen me para!”, ka përfunduar ajo.
Flaka Media














