Ekspertët paralajmërojnë: Britania rrezikon rritje të mushkonjave dhe sëmundjeve tropikale

Moti aktual në Mbretërinë e Bashkuar po krijon kushte gjithnjë e më të favorshme për një rritje të madhe të mushkonjave, kanë paralajmëruar ekspertët e fushës.

Sipas Mojca Kristan, asistente profesore në entomologjinë mjekësore në Shkollën e Higjienës dhe Medicinës Tropikale Londër (LSHTM), ndryshimet klimatike mund të bëjnë që disa lloje mushkonjash, të afta të transmetojnë sëmundje të rënda si dengue dhe Zika, të vendosen në Britani brenda pak viteve.

Ajo thekson se kushtet aktuale të motit në Britani janë ideale për shumimin e mushkonjave, pasi ato preferojnë temperaturat e ngrohta dhe ujin e ndenjur për vendosjen e vezëve.

“Për t’u mbrojtur nga pickimet, përdorni repelent kundër insekteve dhe mbuloni lëkurën me veshje të gjata, veçanërisht në mbrëmje,” këshilloi Kristan.

Sipas saj, speciet invazive si Aedes albopictus (mushkonja tigër aziatike) dhe Aedes aegypti (mushkonja egjiptiane), të cilat mund të transmetojnë viruse si dengue, chikungunya dhe Zika, ende nuk janë të pranishme në mënyrë të qëndrueshme në Britani, por janë zbuluar vezë të tyre në disa raste.

Ekspertët paralajmërojnë gjithashtu se disa prej këtyre sëmundjeve tashmë janë prezente në disa zona të Evropës, veçanërisht në rajonin e Mesdheut, ndërsa modelet klimatike sugjerojnë se deri në vitet 2060 Londra mund të ketë kushte të përshtatshme për përhapjen e dengue.

Flaka