Evropa drejt kufizimit të rrjeteve sociale për adoleshentët, vajzat më të prekura sipas studimeve

Bashkimi Evropian dhe disa shtete evropiane po shqyrtojnë masa për kufizimin ose ndalimin e përdorimit të rrjeteve sociale për adoleshentët, pas rritjes së shqetësimeve për ndikimin e tyre në shëndetin mendor dhe jetën e përditshme.

Sipas një studimi të mbështetur nga OBSH përmes projektit HBSC, përdorimi problematik i rrjeteve sociale tek adoleshentët në Evropë është rritur nga 7% në vitin 2018 në 11% në vitin 2022. Ky fenomen përfshin sjellje si varësia nga platformat digjitale, vështirësia për t’u shkëputur dhe neglizhimi i aktiviteteve të tjera të rëndësishme.

Raporti tregon se disa vende si Rumania, Irlanda dhe Malta kanë nivelet më të larta të përdorimit problematik tek 15-vjeçarët, ndërsa Holanda, Danimarka dhe Estonia raportojnë nivele më të ulëta.

Debati politik po intensifikohet në vende si Britania e Madhe, Franca, Spanja, Austria, Greqia dhe Danimarka, ku qeveritë po shqyrtojnë masa ligjore për të kufizuar aksesin e të miturve në rrjetet sociale. Shqetësimet kryesore lidhen me bullizmin online, varësinë digjitale dhe rastet e vetëdëmtimit.

Studimi thekson gjithashtu se vajzat janë më të prekura se djemtë, duke e bërë këtë çështje edhe më të ndjeshme në diskutimet për rregullimin e platformave sociale në të gjithë Evropën.

Flaka