Evropa feston 75-vjetorin e Deklaratës së Shumanit – Themelin e Bashkimit Evropian

Sot, Bashkimi Evropian feston 75-vjetorin e Deklaratës së Shumanit, një moment historik që shënoi fillimin e projektit evropian për paqe, unitet dhe bashkëpunim pas Luftës së Dytë Botërore. Kjo deklaratë e mbajtur më 9 maj 1950 nga Ministri i Jashtëm francez Robert Schuman hodhi bazat për krijimin e Bashkimit Evropian të sotëm, duke propozuar bashkimin e prodhimit të qymyrit dhe çelikut mes Francës, Gjermanisë dhe vendeve të tjera evropiane – një hap i parë drejt integrimit të thellë ekonomik dhe politik, shkruan Flaka

Për të shënuar këtë përvjetor të rëndësishëm, në të gjitha vendet anëtare të BE-së dhe përtej saj po zhvillohen aktivitete të shumta festive, edukative dhe kulturore. Institucionet e BE-së në Bruksel dhe Strasburg kanë hapur dyert për qytetarët, duke ofruar mundësi për t’u njohur nga afër me punën dhe vlerat e unionit.

Ndërtesat ikonike dhe monumentet në mbarë globin janë ndriçuar me ngjyrat blu dhe yjet e artë të flamurit të BE-së. Një nga pikat kulmore të festimeve ndërkombëtare këtë vit është programi i veçantë për Ditën e Evropës në Expo 2025 në Osaka, Japoni, ku prezantohet historia, kultura dhe vizioni i BE-së për të ardhmen.

Presidentja e Komisionit Evropian, Ursula von der Leyen, deklaroi në këtë rast: “Në një kohë sfidash të mëdha për demokracinë, sigurinë dhe mjedisin global, Bashkimi Evropian vazhdon të jetë një spirancë stabiliteti dhe shprese. 75 vite më parë, Schuman hodhi një ide të guximshme – sot ajo ide është bërë realitet për më shumë se 450 milionë qytetarë evropianë.”

75-vjetori i Deklaratës së Shumanit është një kujtesë e fuqishme se nga bashkëpunimi mund të lindë paqja dhe se e ardhmja e Evropës ndërtohet mbi vlera të përbashkëta si demokracia, solidariteti dhe sundimi i ligjit. Flaka Media