Facebook ndryshon algoritmin: më shumë Reels të reja dhe përmbajtje të personalizuar për përdoruesit

Facebook ka njoftuar ndryshime të rëndësishme në algoritmin e tij, me synimin për t’i ofruar përdoruesve përmbajtje më të freskët dhe më të rëndësishme për ta. Sipas kompanisë, përdoruesit do të shohin deri në 50% më shumë Reels të postuara atë ditë, duke e bërë përvojën më dinamike dhe të lidhur me trendet aktuale.

Kompania e Mark Zuckerberg thekson se dëshiron të “kthehet te rrënjët e saj” duke i rilidhur njerëzit me miqtë dhe familjen, edhe pse fokusi kryesor mbetet tek përmbajtja virale dhe videot e shkurtra.

Një element i ri është se algoritmi nuk do të bëjë dallim mes videove reale dhe atyre të krijuara me inteligjencë artificiale. Nëse përdoruesit shfaqin interes për klipet e gjeneruara nga mjete si Sora ose Midjourney, ata do të shohin më shumë nga kjo përmbajtje. Nga ana tjetër, nëse preferojnë video nga miqtë e tyre, algoritmi do të përshtatet sipas këtyre sinjaleve.

“Gjithçka varet nga sinjalet që një përdorues i dërgon algoritmit. Nëse ju pëlqen, komentoni dhe ndani postime të caktuara, do të shihni më shumë prej tyre. Nëse i shënoni si ‘jo të interesuar’, do të shihni gjithnjë e më pak,” shpjegoi Jagjit Chawla, zëvendëspresident i Facebook-ut për produktin, në një intervistë për CNET.

Përveç kësaj, Facebook po prezanton edhe rekomandime kërkimi të mundësuara nga inteligjenca artificiale, të cilat do t’u sugjerojnë përdoruesve terma dhe tema të reja bazuar në interesat e tyre.

Sipas Meta, koha e kaluar duke parë video në Facebook është rritur me 20% çdo vit, duke e bërë këtë format një nga shtyllat kryesore të platformës.

Flaka