Greqia miraton ligjin e ri: Qëndrimi i paligjshëm, deri në 5 vite burg

Parlamenti grek ka miratuar sot një ligj të ri dhe shumë të debatueshëm, i cili parashikon kthimin e detyruar të azilkërkuesve të refuzuar dhe kriminalizon qëndrimin e paligjshëm në vend, me dënime nga dy deri në pesë vjet burg.

Ligji, i mbështetur nga shumica e partisë konservatore Demokracia e Re (ND), partia nacionaliste Niki dhe disa deputetë të pavarur të ekstremit të djathtë, u miratua pas një debati të ashpër në parlament. Të gjitha partitë e majta të opozitës votuan kundër, duke e cilësuar aktin si të padrejtë dhe diskriminues.

Pasok e quajti ligjin “të paligjshëm, kaotik dhe të pazbatueshëm”, ndërsa Partia Komuniste (KKE) e cilësoi “racist dhe të turpshëm”.

Sipas dispozitave të reja, shtetasit e vendeve të treta që kanë marrë urdhër kthimi do të mbahen të ndaluar deri në largimin e tyre. Për ata që rikthehen në Greqi pa dokumente pas dëbimit, parashikohen të paktën tre vjet burg.

Ministri i Migracionit, Thanos Plevris, deklaroi se Greqia është “vendi i parë që prezanton një masë kaq parandaluese” dhe se emigrantët pa dokumente “do të vendosen në paraburgim administrativ dhe do të shkojnë në burg”.

Ky ligj vjen vetëm dy muaj pas pezullimit tremujor të kërkesave për azil për shtetas nga vendet e Afrikës së Veriut, masë e cila gjithashtu u kritikua nga organizatat për të drejtat e njeriut.

Flaka