Instagram dhe AI ndezin alarm te përdoruesit, Meta lejon përdorimin e fotove publike për krijime të reja

Një ndryshim i ri nga Meta ka shkaktuar shqetësim te përdoruesit e Instagramit, pasi një funksion i inteligjencës artificiale mund të lejojë përdorimin e fotove dhe videove publike për krijimin e imazheve të reja përmes AI.

Mjeti i quajtur “Muse Image” ka ngritur debate mbi privatësinë dhe sigurinë e të dhënave personale, pasi opsioni raportohet se aktivizohet automatikisht për profilet publike.

Sipas përditësimit, përdoruesit mund të përdorin përmbajtje nga profile publike përmes kërkesave të drejtuara ndaj inteligjencës artificiale, duke krijuar imazhe të reja bazuar në fotot ekzistuese. Ky funksion nuk prek llogaritë private dhe profilet e personave nën moshën 18 vjeç.

Për të shmangur përdorimin e fotove të tyre nga mjetet e AI-së, përdoruesit mund ta çaktivizojnë këtë opsion nga cilësimet e Instagramit duke hyrë te “Settings and activity”, më pas te “Sharing and reuse” dhe duke fikur funksionin që lejon përdorimin e përmbajtjes me veçoritë e inteligjencës artificiale të Metës.

Ekspertët e sigurisë kibernetike rekomandojnë që përdoruesit të kontrollojnë cilësimet e privatësisë dhe të jenë të kujdesshëm me përmbajtjen që publikojnë në profilet publike, veçanërisht në një periudhë kur teknologjia e inteligjencës artificiale po zhvillohet me shpejtësi.

Flaka