Instagram ndryshon algoritmin: më shumë rëndësi ka përmbajtja, jo ndjekësit

Platforma e njohur Instagram po ndryshon mënyrën se si shpërndahet përmbajtja, duke i dhënë prioritet reagimit real të përdoruesve dhe jo më vetëm numrit të ndjekësve apo përdorimit të hashtag-ëve.

Sipas sinjaleve të fundit nga drejtuesi i Instagram, Adam Mosseri, algoritmi i ri fokusohet kryesisht te mënyra se si përdoruesit ndërveprojnë me një postim.

Tre faktorët kryesorë që ndikojnë në performancën e përmbajtjes janë:

• Koha që përdoruesit kalojnë duke e parë një postim
• Niveli i ndërveprimit në raport me shikueshmërinë
• Sa shpesh përmbajtja shpërndahet nga të tjerët

Në praktikë, Instagram e teston fillimisht çdo postim te një audiencë e vogël. Nëse ai nuk arrin të tërheqë vëmendjen ose të gjenerojë angazhim, shpërndarja kufizohet. Por nëse postimi performon mirë që në fillim, algoritmi e promovon atë te një audiencë më e gjerë.

Ky ndryshim hap mundësi të reja për krijuesit e vegjël dhe bizneset që nuk kanë një numër të madh ndjekësish, por që krijojnë përmbajtje cilësore dhe tërheqëse. Nga ana tjetër, ai penalizon postimet e dobëta, të përsëritura apo ato që mbështeten vetëm te hashtag-ët.

Në thelb, mesazhi i platformës është i qartë: nuk ka më rëndësi sa shpesh poston, por sa e vlefshme dhe interesante është përmbajtja që publikon.

Flaka