Investimet në Gostivar, reagon BDI

Si Bashkimi Demokratik për Integrim – Gostivar, duhet të reagojmë ndaj deklaratave të fundit të u.d. kryetarit të Komunës së Gostivarit, Valbon Limani, si një kundërpërgjigje ndaj fjalëve të pavërteta mbi investimet në infrastrukturë dhe investimeve të tjera në qytet, thuhet në kumtesën nga BDI-ja e Gostivarit.

“E para dhe më e rëndësishmja, BDI – Gostivar thekson se Gostivari kurrë nuk ka qenë më i lënë pas dore se sa në këtë mandat, kur investimet dhe përkushtimi ndaj qytetit ka qenë zero nga u.d. kryetari aktual. Rrugët dhe infrastruktura – Projektet për asfaltime apo rikonstruim të rrugëve në qytet janë lënë në harresë, jo rastësisht sot kemi rrugë në gjendje skandaloze, të papastruara dhe me shumë gropa. Madje edhe ato pak rrugë që janë në gjendje të mirë insfrastrukturore, nuk po dini t’i mirëmbani. Mos të flasim pë rrrugët rurale, të fshatrave, të cilat po ta pyesim u.d. kryetarin, edhe ai vet nuk e di se kur ka qenë investimi i fundit i komunës nëpër ato rrugë”, thonë nga BDI-Gostivar.

Sipas tyre, Z.Limani po krenohet edhe me investimet në terene sportive dhe pishina! Shumë bukur, por të njejtat nuk po i shohim!

“A mendoni që qytetarët e Gostivarit nuk e dinë se asnjë premtim që dhatë në zgjedhje nuk e keni realizuar? Për cilat terene sportive po flisni? Për cilat projekte mbitokësore e nëntokësore? Për cilat pishina? Faktet në teren flasin të kundërtën. Sot Gostivari nuk ka as parkingje në kate, as fusha për rekreacion madje as aquaparkun e famshëm që e keni promovuar si projekt kapital.Projekte të bukura që kanë mbetur vetëm në letër”, vijon kumtesa.

BDI-Gostivar ka reaguar dhe do të vazhdojë të reagojë ndaj shpifjeve dhe të pavërtetave që po tentoni t’i shisni si arritje nëpër media, mirëpo po harroni se gostivarasit nuk mund t’i mashtroni dhe t’i gënjeni siç mendoni ju, sepse ata çdo ditë po përballen me keqmenaxhimin dhe paaftësinë tuaj si udhëheqësi komunale, përfundon reagimi nga Bashkimi Demokratik për Integrim – Gostivar