Japonia po mbetet prapa në garën e inteligjencës artificiale: Vetëm 8.4% e punonjësve e përdorin në punë

Japonia po përballet me mungesë të fuqisë punëtore, plakje të popullsisë dhe probleme të vazhdueshme me produktivitetin, por pavarësisht këtyre sfidave, kompanitë japoneze po tregohen të ngadalta në përfshirjen e inteligjencës artificiale në vendin e punës.

Sipas të dhënave të Organizatës për Bashkëpunim dhe Zhvillim Ekonomik (OECD), vetëm 8.4% e punonjësve në Japoni përdorin AI-në në punën e tyre. Në SHBA kjo shifër arrin rreth 50%, ndërsa në Mbretërinë e Bashkuar rreth 32%.

Edhe vende të tjera aziatike kanë avancuar më shpejt. Në Singapor, për shembull, 56% e punonjësve deklarojnë se përdorin inteligjencën artificiale disa herë në javë.

Pse po ngurron Japonia?

Ekspertët e lidhin këtë situatë kryesisht me kulturën konservatore të biznesit japonez dhe kujdesin e madh ndaj rrezikut. Sipas Austin Xu, bashkëthemelues i kompanisë amerikane Kuse AI, kompanitë japoneze kërkojnë më shumë prova dhe garanci përpara se t’i besojnë AI-së dhe ta përdorin atë në mënyrë të gjerë.

Edhe Parrisa Haghirian, profesoreshë në Universitetin e Shkencave të Avancuara të Kiotos, vlerëson se kompanitë japoneze janë përgjithësisht të kujdesshme ndaj ndryshimeve të mëdha teknologjike.

Problemi duket veçanërisht i dukshëm në sektorin shëndetësor. Disa spitale në Japoni ende nuk i kanë digjitalizuar plotësisht dosjet e pacientëve, duke e bërë edhe më të vështirë integrimin e teknologjive të avancuara të AI-së.

Qeveria japoneze është e vetëdijshme për këtë hendek dhe po përpiqet të nxisë përdorimin e inteligjencës artificiale. Parlamenti miratoi vitin e kaluar një ligj për promovimin e AI-së, me synimin për të nxitur zhvillimin dhe përdorimin e kësaj teknologjie.

Përdorimi më i madh i AI-së shihet si një mënyrë për të rritur produktivitetin dhe për të përballuar mungesën e fuqisë punëtore. Japonia, megjithatë, vazhdon të ketë produktivitetin më të ulët ndër vendet e G7.

Eksperti i teknologjisë Yasushi Ogasawara thekson se një nga vështirësitë kryesore është ruajtja e vendeve të punës. Sipas tij, megjithëse qeveria promovon AI-në, rikualifikimin dhe aftësitë digjitale, në praktikë kompanitë përballen me vështirësi për t’i përshtatur punonjësit me kërkesat e reja.

Kështu, ndërsa SHBA-ja dhe vende të tjera po përshpejtojnë integrimin e inteligjencës artificiale në ekonomi, Japonia po përballet me dilemën se si të përfitojë nga teknologjia pa rrezikuar stabilitetin e tregut të punës.

Flaka