Kallas: Sanksione të reja ndaj Rusisë, Shqipëria ka bërë progres të shkëlqyer

Kryediplomatja e Bashkimit Europian, Kaja Kallas, në një prononcim për mediat ndërkombëtare nga Samiti Politik Europian në Tiranë, foli për sfidat kryesore të momentit në arenën ndërkombëtare dhe për perspektivën evropiane të rajonit.

E pyetur për situatën në Ukrainë, Kallas deklaroi se BE po përgatit një paketë të re sanksionesh ndaj Rusisë, për shkak të agresionit të vazhdueshëm:
“Po mendojmë për paketën tjetër. Kemi një udhërrëfyes që e kemi propozuar javën e kaluar, sepse është tejet e rëndësishme për të vazhduar këtë luftë. Duhet të jemi të bashkuar sepse Rusia nuk do paqe,” tha ajo, duke shtuar se presioni ndaj Moskës duhet të vijojë me të gjitha mjetet në dispozicion.

Kallas komentoi gjithashtu edhe dialogun Kosovë–Serbi, duke theksuar se BE-ja ka emëruar një përfaqësues të ri të posaçëm dhe se pret përparim drejt normalizimit të marrëdhënieve mes dy vendeve.

Në lidhje me aspiratën evropiane të Shqipërisë dhe objektivin për anëtarësim në BE në vitin 2030, ajo u shpreh optimiste:
“Shqipëria ka bërë progres të shkëlqyer për reformat. Tani është koha që edhe Europa të marrë hapat e duhur për zgjerimin,” tha Kallas, duke nënvizuar se ka ardhur momenti politik për një përparim konkret në këtë proces.

Deklaratat e saj vijnë në një kohë kur në Tiranë po zhvillohet Samiti i Komunitetit Politik Europian, me pjesëmarrjen e liderëve nga 47 vende dhe institucione të rëndësishme ndërkombëtare. Flaka Media