Kërkohet hetim për zgjedhjen e rektorit të UEJL-së! Kush qënddron pas iniciativës për reforma në UEJL?
Një iniciativë që prezantohet si “Iniciativa për reforma në UEJL” pretendon se ka paraqitur parashtresë në Inspektoratin Shtetëror të Arsimit dhe Komisionin Shtetëror për Parandalimin e Korrupsionit, duke kërkuar verifikimin e ligjshmërisë së zgjedhjes së rektorit Sadudin Ibraimi. Në materialin e dërguar në adresën elektronike të redaksisë Flaka ngrihen dy çështje: përmbushja e kriterit të njohjes së gjuhës angleze dhe një konflikt i mundshëm interesi në procesin e votimit.
Në adresën elektronike të redaksisë Flaka ka arritur një material i nënshkruar nga “Iniciativa për reforma në UEJL”, në të cilin kërkohet verifikim institucional i procedurës së zgjedhjes së rektorit të Universitetit të Evropës Juglindore (UEJL), Sadudin Ibraimi.
Sipas pretendimeve të paraqitura në material, një grup personash nga personeli akademik dhe administrativ i universitetit ka kërkuar nga institucionet kompetente të shqyrtojnë nëse kandidati i zgjedhur i ka përmbushur të gjitha kriteret e konkursit dhe nëse gjatë procedurës ka pasur konflikt interesi.
Dyshimet për kriterin e gjuhës angleze
Njëra nga çështjet që kërkohet të verifikohet lidhet me njohjen e gjuhës angleze.
Në material pretendohet se në aplikimin e datës 3 prill 2025, Sadudin Ibraimi e ka deklaruar njohjen e gjuhës angleze në nivel fillestar, të shënuar si “beginner”, ndërsa konkursi për zgjedhjen e rektorit, sipas iniciativës, kërkonte njohje solide të kësaj gjuhe.
“Kërkohet të verifikohet se si është konstatuar përmbushja e këtij kriteri të detyrueshëm”, thuhet në materialin e dërguar në redaksinë Flaka.
Pretendime për konflikt të mundshëm interesi
Çështja e dytë ka të bëjë me një lidhje familjare të pretenduar ndërmjet rektorit Sadudin Ibraimi dhe Veli Krecit, anëtar i organeve universitare.
Sipas materialit, të dy janë kushërinj të parë, ndërsa Kreci ka marrë pjesë në votimin e Senatit për tri nga katër kandidaturat për rektor.
Në të njëjtin material pretendohet se në një fazë të mëvonshme të procedurës, gjatë vendimmarrjes në Bordin e Universitetit, Kreci është përjashtuar nga votimi nga presidenti i Bordit, pikërisht për shkak të konfliktit të interesit me kandidatin Ibraimi.
“Iniciativa” shtron pyetjen: “Pse lidhja familjare mes tyre është marrë parasysh në Bord, por jo edhe në Senat?”
Në parashtresën e pretenduar kërkohet këqyrja e dokumentacionit origjinal, procesverbaleve dhe rezultateve të votimit, si dhe vlerësimi i përputhshmërisë së procedurës me dispozitat ligjore për konfliktin e interesit dhe kriteret e konkursit.
Pretendimet presin verifikim institucional
Në përfundim të materialit, nisma kërkon që Inspektorati Shtetëror i Arsimit dhe Komisioni Shtetëror për Parandalimin e Korrupsionit të verifikojnë pretendimet dhe, nëse konstatohen shkelje, të ndërmarrin masat përkatëse ligjore.
Redaksia Flaka thekson se deri në publikimin e këtij lajmi nuk ka arritur të konfirmojë në mënyrë të pavarur identitetin e personave që qëndrojnë pas “Iniciativës për reforma në UEJL”, autenticitetin e komunikimit elektronik dhe dokumentacionit të bashkëngjitur, si dhe nëse parashtresa është pranuar zyrtarisht nga institucionet e përmendura.
Po ashtu, pretendimet e paraqitura në material nuk përbëjnë fakte të vërtetuara dhe nuk nënkuptojnë se janë konstatuar shkelje ligjore nga ana e rektorit apo e ndonjë anëtari të organeve universitare.
Flaka do të kërkojë qëndrim nga UEJL-ja, rektori Sadudin Ibraimi dhe institucionet kompetente, duke publikuar edhe përgjigjet e tyre në interes të informimit të drejtë dhe të plotë të publikut.
















