Këshilli i Komunës së Gostivarit miraton raportet financiare: ndërmarrjet publike e mbyllën vitin me fitim

Seanca e gjashtë e Këshillit të Komunës së Gostivarit u karakterizua nga prezantimi i raporteve pozitive financiare të ndërmarrjeve publike lokale. Sipas llogarive përfundimtare për vitin e kaluar, të gjitha ndërmarrjet nën kompetencën e Komunës së Gostivarit kanë realizuar fitim gjatë vitit 2025, gjë që u theksua si një rast i rrallë në funksionimin e vetëqeverisjes lokale.

Fitimin më të madh në vlerë absolute e ka shënuar NP Komunalec Gostivar. Nga të ardhurat totale prej rreth 230 milionë denarësh, ndërmarrja ka arritur ta përmbyllë vitin me një fitim neto prej 19 milionë denarësh.

Një vit të suksesshëm ka pasur edhe NP Parkingjet e Qytetit dhe Gjelbërimi Gostivar. Me të ardhura totale prej afro 33 milionë denarësh, kjo ndërmarrje ka realizuar fitim prej 5,1 milionë denarësh. Nga drejtoria u bë e ditur se për këtë vit planifikohet një program i ri punësimi, si dhe investim për blerjen e një automjeti special “merimangë” (pajak) për nevojat e qytetit.

Bilanc pozitiv ka shënuar edhe NP Rinia Gostivar, ndërmarrja që menaxhon objektet sportive. Me qarkullim total prej rreth 6 milionë denarësh, gjatë vitit të kaluar ajo ka realizuar fitim prej rreth 230 mijë denarësh, ndërsa pjesa më e madhe e të ardhurave është siguruar nga pagesa e parkingut pranë sallës sportive.

Në të njëjtën seancë, këshilltarët dhanë edhe mbështetje unanime për sportin dhe sektorin civil. Përveç shqyrtimit të buxhetit dhe llogarive përfundimtare, u miratua ndarja e mjeteve financiare për disa klube sportive dhe shoqata:

• ZHKK Gostivar (Klubi i Basketbollit për Femra) – 1.000.000 denarë
• KK Gostivar 2 – 400.000 denarë
• FK Proleter Gostivar – 300.000 denarë
• Snow Sport Club Gostivar – 300.000 denarë
• Akademia e Futbollit Talenti – 150.000 denarë

Gjithashtu, komuna do të ndajë mjete edhe për sektorin civil. Asociacioni për Integrimin e Romëve “Mesecina” – Gostivar do të përfitojë 150.000 denarë për realizimin e aktiviteteve të saj.

Vendimet e miratuara në këtë seancë synojnë të mbështesin zhvillimin e sportit lokal dhe të forcojnë aktivitetin e organizatave qytetare në komunë. Gazeta Flaka