KF Kumanova në zi për futbollistin e ri Agan Asani që vdiq në aksident tragjik!

Një tragjedi e rëndë ka goditur Kumanovën dhe komunitetin sportiv shqiptar, pasi ka ndërruar jetë 13-vjeçari Agan Asani nga fshati Çerkez i Kumanovës, futbollist i ri i talentuar, i cili humbi jetën si pasojë e një aksidenti në komunikacion.

Lajmin për ndarjen e tij nga jeta e ka bërë të ditur edhe trajneri i tij, Ismet Zeqriri, përmes një mesazhi prekës, ku shprehu dhimbjen e madhe të klubit dhe bashkëlojtarëve për humbjen e futbollistit të ri.

“Me pikëllim të thellë morëm lajmin për ndarjen nga jeta të lojtarit tonë 13-vjeçar, Agan Asani. Humbja e tij na ka prekur thellë si klub, duke lënë dhimbje të madhe te bashkëlojtarët, trajnerët dhe gjithë familja e KF Kumanova. Në këto momente të vështira, i shprehim ngushëllimet më të sinqerta familjes Asani, të afërmve dhe miqve. Kujtimi për Aganin do të mbetet gjithmonë në zemrat tona. U prehtë në paqe”, thuhet në reagim.

Sipas informacioneve zyrtare nga Ministria e Punëve të Brendshme, aksidenti ka ndodhur më 28 maj 2026, rreth orës 21:10, në rrugën rajonale Kumanovë–Shkup, në fshatin Çerkez.

“Në aksident janë përfshirë një automjet pasagjerësh ‘Mercedes’ me targa të Kumanovës, i drejtuar nga F.S. (24) nga Kumanova dhe një trotinet elektrik i drejtuar nga një i mitur 13-vjeçar nga fshati Çerkez. Pas aksidentit, i mituri është transportuar në Spitalin e Përgjithshëm të Kumanovës, ku mjeku ka konstatuar vdekjen e tij”, njoftuan nga MPB.

Autoritetet bëjnë të ditur se shoferi i automjetit është privuar nga liria vetëm pak minuta pas aksidentit, ndërsa prokurori publik dhe ekipet hetimore kanë kryer ekspertizën në vendngjarje për zbardhjen e plotë të rastit.

Vdekja e Agan Asanit ka shkaktuar pikëllim të madh te familjarët, shokët, bashkëlojtarët dhe komuniteti lokal, duke rikthyer sërish debatin për sigurinë në trafik dhe përdorimin e trotineteve elektrike nga të miturit. Gazeta Flaka