Kina arrin përparim historik në hapësirë, rikthen me sukses pjesën e parë të raketës në tokë

Kina ka shënuar një sukses të rëndësishëm në teknologjinë hapësinore, pasi ka realizuar me sukses rikthimin e pjesës së parë të një rakete bartëse gjatë një testi orbital.

Sipas mediave shtetërore kineze, raketa Long March 10B u lëshua nga ishulli Hainan në jug të Kinës dhe rreth gjashtë minuta pas ndarjes nga pjesa e sipërme e raketës, përforcuesi i fazës së parë u rikthye në mënyrë vertikale në një platformë lundruese.

Pamjet e publikuara nga një llogari në rrjetet sociale e lidhur me transmetuesin shtetëror CCTV tregojnë përforcuesin e raketës duke zbritur drejt platformës, ndërsa në pjesën e sipërme shfaqet tym gjatë uljes.

Sipas CCTV, ky test përfaqëson një përparim të madh për Kinën në zhvillimin e raketave të ripërdorshme, një teknologji që konsiderohet thelbësore për uljen e kostove të misioneve hapësinore dhe për zgjerimin e infrastrukturës satelitore.

Korporata Kineze e Shkencës dhe Teknologjisë së Hapësirës Ajrore (China Aerospace Science and Technology Corporation) deklaroi përmes një postimi në rrjetet sociale se misioni shënon “një përparim historik” në teknologjinë e raketave të ripërdorshme dhe krijon bazë për përmirësimin e kapaciteteve hapësinore të Kinës.

Gjatë këtij misioni, raketa gjithashtu arriti të vendosë një satelit në orbitë, sipas raportimeve të mediave shtetërore kineze.

Ky sukses vjen pas disa testeve të dështuara të kompanive të tjera kineze, ndërsa Pekini synon të forcojë pozicionin e tij si një fuqi e madhe hapësinore dhe të konkurrojë me kompani amerikane si SpaceX dhe Blue Origin në fushën e raketave të ripërdorshme.

Teknologjia e raketave të ripërdorshme shihet si një faktor kyç në të ardhmen e eksplorimit hapësinor, pasi mund të ulë ndjeshëm kostot dhe kohën e përgatitjes së lëshimeve. Ajo gjithashtu ka rëndësi strategjike për kapacitetet satelitore dhe mbrojtjen.

Raketa Long March 10B është pjesë e planeve afatgjata të Kinës për misione me astronautë drejt Hënës dhe për zgjerimin e rolit të saj në garën globale hapësinore.

Flaka