Meta përballet me padi masive në SHBA, akuzohet se krijoi varësi te fëmijët

Meta Platforms, kompania mëmë e Facebook dhe Instagram, po përballet me një proces të rëndësishëm gjyqësor në SHBA, ku 29 shtete amerikane e akuzojnë se ka projektuar platformat e saj në mënyrë që të krijojnë varësi te fëmijët dhe adoleshentët.

Shtetet paditëse pretendojnë se Meta ka vendosur interesat financiare mbi mirëqenien e përdoruesve të rinj, duke shfrytëzuar dobësitë psikologjike të të miturve. Sipas tyre, përdorimi problematik i platformave mund të lidhet edhe me rritjen e ankthit dhe depresionit tek të rinjtë.

Në qendër të procesit janë edhe akuzat për privatësinë. Meta dyshohet se ka mbledhur dhe përdorur të dhënat personale të fëmijëve nën moshën 13 vjeç pa pëlqimin e prindërve.

Padia është krahasuar nga një prej prokurorëve të përgjithshëm me proceset e mëdha ligjore të zhvilluara në të kaluarën kundër kompanive të duhanit dhe prodhuesve të opioideve.

Për kompaninë, çështja mund të ketë edhe pasoja të mëdha financiare. Shtetet kërkojnë gjoba civile që mund të arrijnë deri në 200 miliardë dollarë, ndërsa në dokumentet e gjykatës është përmendur edhe një skenar teorik me gjoba shumë më të larta.

Procesi pritet të jetë me rëndësi për të ardhmen e platformave sociale, veçanërisht për mënyrën se si kompanitë teknologjike hartojnë produktet e tyre dhe mbrojnë përdoruesit e mitur.

Flaka