Meta vendos kufizime PG-13 për adoleshentët në Instagram

Meta ka njoftuar një masë të re për mbrojtjen e adoleshentëve në Instagram, duke vendosur kufizime të reja të përmbajtjes që do të funksionojnë sipas standardeve të një filmi PG-13. Kjo do të thotë se përdoruesit nën 18 vjeç nuk do të ekspozohen më ndaj materialeve që përfshijnë gjuhë të ashpër, skena seksuale, drogë, sjellje të rrezikshme apo përmbajtje që nxit vetëlëndimin.

Sipas kompanisë, adoleshentët nuk do të mund të ndryshojnë vetë cilësimet e tyre pa lejen e prindërve, duke i dhënë familjeve më shumë kontroll mbi përvojën online të fëmijëve. Përveç kësaj, Meta po prezanton edhe një nivel më të rreptë të quajtur “përmbajtje e kufizuar”, që prindërit mund ta aktivizojnë për të bllokuar edhe më shumë lloje materiali dhe ndërveprimesh.

Meta e ka cilësuar këtë si “përditësimin më të rëndësishëm që nga prezantimi i llogarive për adoleshentë vitin e kaluar”, duke theksuar se masa do të nisë fillimisht në SHBA, Mbretërinë e Bashkuar, Australi dhe Kanada, për t’u zgjeruar globalisht deri në fund të vitit.

Ky vendim vjen në një kohë kur kompania përballet me kritika të ashpra për ndikimin negativ të rrjeteve sociale tek fëmijët dhe të rinjtë. Një raport i fundit zbuloi se algoritmet e Instagram-it rekomandonin ende përmbajtje seksuale dhe vetëlënduese për llogaritë e testuara si adoleshentë.

Meta ka bërë të ditur gjithashtu se inteligjenca artificiale e përdorur në aplikacion do të respektojë standardet PG-13, duke shmangur përgjigjet e papërshtatshme për moshën.

Flaka