Microsoft Flight Simulator 2024 fluturon drejt PS5 këtë dhjetor

Gjatë eventit të fundit State of Play të Sony-t, u konfirmua se Microsoft Flight Simulator 2024 do të vijë për herë të parë në PlayStation 5 më 8 dhjetor 2025, duke shënuar një hap të madh në bashkëpunimin mes dy gjigantëve të teknologjisë.

Versioni për PS5 do të ruajë të njëjtën cilësi grafike dhe realizëm të jashtëzakonshëm si në Xbox dhe PC, duke përfshirë avionë komercialë masivë, mbi 150 modele avionësh, si dhe përdorimin e të dhënave reale të motit dhe gjeografisë për një eksperiencë sa më autentike. Për më tepër, është konfirmuar mbështetja për PS VR2 (në vitin 2026), që do t’i lejojë lojtarët të përjetojnë ndjesinë e fluturimit drejtpërdrejt nga kabina.

Ky lajm vjen si pjesë e strategjisë së Microsoft për të sjellë gjithnjë e më shumë tituj të mëdhenj në platformat rivale. Pas lojërave si Sea of Thieves dhe Pentiment, tashmë edhe tituj si Indiana Jones and the Great Circle dhe Flight Simulator 2024 po bëhen pjesë e katalogut të PS5.

Ky hap shihet si një përfitim i dyanshëm: Microsoft zgjeron audiencën e lojërave të saj, ndërsa Sony pasuron ofertën për lojtarët e vet. Shembulli i Helldivers 2, i cili nga ekskluzivitet i PS5 u bë një nga lojërat më të shitura edhe në Xbox, tregon se kjo strategji mund të sjellë sukses të madh për të dyja kompanitë.

Flaka