OpenAI do të lejojë përmbajtje erotike në ChatGPT për përdoruesit e rritur

Shefi ekzekutiv i OpenAI, Sam Altman, ka konfirmuar se versionet e ardhshme të ChatGPT do të përfshijnë opsione të reja për përdoruesit e rritur, duke përfshirë edhe materiale erotike. Në një postim në X, Altman tha se qëllimi është që chatbot-i të sillet në mënyrë më njerëzore, por vetëm nëse përdoruesit e dëshirojnë këtë opsion.

“Deri tani kemi qenë mjaft kufizues për të qenë të kujdesshëm me çështjet e shëndetit mendor. Tani kemi mjete të reja që na lejojnë të zbusim kufizimet në mënyrë të sigurt në shumicën e rasteve,” theksoi Altman.

Ky vendim vjen pas një padie të ngritur në SHBA nga prindërit e një adoleshenti që i mori jetën vetes, të cilët akuzuan OpenAI për kontrolle të pamjaftueshme prindërore. Rasti ka nxitur debat mbi përgjegjësinë e kompanive të inteligjencës artificiale dhe ndikimin e tyre tek të rinjtë.

Ekspertët thonë se hapja ndaj përmbajtjes erotike mund të ndihmojë OpenAI të tërheqë më shumë abonentë me pagesë, por gjithashtu pritet të shtojë presionin mbi ligjvënësit për të vendosur rregullore më të rrepta për përdorimin e chatbot-eve.

Ky zhvillim vjen në një kohë kur edhe kompani të tjera, si xAI e Elon Musk, kanë prezantuar chatbot-e me përmbajtje seksuale eksplicite, duke nxitur konkurrencën në tregun e inteligjencës artificiale.

Flaka