OpenAI mbyll aplikacionin Sora pas disa muajsh

Kompania amerikane e teknologjisë OpenAI ka njoftuar mbylljen e aplikacionit të saj për shpërndarjen e videove të krijuara me inteligjencë artificiale, Sora, vetëm disa muaj pas lansimit.

Në një njoftim të publikuar në X, kompania bëri të ditur se do t’i japë fund platformës, duke shtuar se së shpejti do të ofrojë më shumë detaje për mënyrën se si përdoruesit mund të ruajnë përmbajtjen e tyre.

“Ajo që bëtë me Sora kishte rëndësi dhe e dimë që ky lajm është zhgënjyes”, thuhet në reagimin e kompanisë.

Aplikacioni, i lançuar në shtator, fitoi shpejt popullaritet si një platformë për krijimin dhe shpërndarjen e videove të shkurtra përmes inteligjencës artificiale. Megjithatë, ai u përball me kritika të shumta nga ekspertë dhe organizata të ndryshme, të cilët ngritën shqetësime mbi rreziqet e përhapjes së përmbajtjeve të rreme dhe manipulimeve vizuale, përfshirë fenomenin e njohur si Deepfake.

Kritikët paralajmëruan se teknologji të tilla mund të kontribuojnë në rritjen e përmbajtjeve të dëmshme në internet dhe të nxisin sjellje si “doomscrolling”, duke shtuar sfidat për kontrollin e informacionit në epokën digjitale.

Mbetet për t’u parë se cilat do të jenë hapat e ardhshëm të OpenAI në zhvillimin e mjeteve të avancuara të inteligjencës artificiale, pas këtij vendimi të papritur.

Flaka