OpenAI vendos kufij për Sora 2: Fundi i videove me personazhe pa leje

OpenAI ka njoftuar dy ndryshime të rëndësishme në aplikacionin e saj të ri për gjenerimin e videove, Sora 2, pas shqetësimeve të ngritura për përdorimin e personazheve të njohur pa leje. Javën e kaluar, Sora 2 u bë viral për aftësinë e tij për të krijuar video të shkurtra përmes komandave me tekst, por shumë prej tyre përfshinin personazhe të njohur nga seriale si SpongeBob SquarePants, South Park, Pokémon dhe Rick and Morty.

Në një postim zyrtar, CEO i OpenAI, Sam Altman, konfirmoi se kompania do të zbatojë një sistem të ri kontrolli për autorët që zotërojnë të drejtat e personazheve. Kjo do të ndalojë përdoruesit të gjenerojnë video me personazhe të mbrojtur nga IP, nëse nuk ka leje të qartë nga studioja apo agjencia përkatëse. Kjo lëvizje vjen pas komunikimeve paraprake me Hollywood-in, ku OpenAI i kërkoi palëve të shprehnin qartazi nëse dëshirojnë të përfshihen në platformë.

Ndryshimi i dytë ka të bëjë me monetizimin e përmbajtjes së gjeneruar nga përdoruesit. OpenAI planifikon të shpërblejë krijuesit gjatë periudhave me kërkesë të lartë, duke ndarë të ardhurat me autorët. Altman tha se “duhet të gjejmë mënyra për të gjeneruar të ardhura nga videot”, duke lënë të hapur mundësinë për një sistem shpërblimi të strukturuar në të ardhmen.

Këto masa sinjalizojnë një përpjekje të OpenAI për të balancuar inovacionin me respektimin e të drejtave të autorit dhe për të krijuar një ekosistem të qëndrueshëm për krijuesit e përmbajtjes.

Flaka