PS-PD, drejt konsensusit për votimin me ID të huaja

Kuvendi pritet të miratojë të hënën ndryshimet në Kodin Zgjedhor, por me shumë mundësi në to nuk do të përfshihet propozimi i bërë nga demokratët që të lejohen të votojnë edhe shtetasit shqiptar me mjete identifikimi të huaja.

Kjo pasi palët duket se janë afër një dakordësie, që këtë çështje t’ia kalojnë për zgjidhje Komisionit Rregullator në KQZ duke interpretuar dispozitat aktuale të ligjit zgjedhor. Kjo u la të kuptohet gjatë diskutimeve në seancën plenare të kësaj të enjte.

Damian Gjiknuri: Meqenëse dhe akti që ka parashikuar procedurën e krahasimit të dokumentave të identifikimit me regjistrin e Gjendjes Civile përcaktohet në KQZ nga akti rregullator, le t’ia përcjellim Komisionit Rregullator për të gjetur një zgjidhje interpretuese nëse ata do ta gjykojnë të ligjshme.

Oerd Bylykbashi: Jepni mundësinë të gjithë shqiptarëve që jetojnë jashtë Shqipërisë që të votojnë. Jepini mundësinë, ose mos i pengoni në të drejtën e tyre për të rrëzuar Edi Ramën nga pushteti.

Palët kanë miratuar ndërkohë me konsensus në Komisionin e Ligjeve propozimin që shpenzimet për dërgimin dhe kthimin e fletës së votimit për votuesit e diasporës nëpërmjet postës të paguhen nga buxheti i shtetit, si dhe që votat e emigrantëve të numërohen nga komisione partiake.

Paketa e ndryshimeve në Kod përfshin gjithashtu edhe propozimin për afrimin e afateve për dorëzimin e listës së kandidatëve për deputet në 70 ditë para zgjedhjeve.