PS6 mund të vijë vetëm në vitin 2028 – Fansat të zhgënjyer nga pritja e gjatë

Kryearkitekti i konsolave të Sony, Mark Cerny, ka lënë të kuptohet se PlayStation 6 është ende disa vite larg. Në një intervistë të fundit me zëvendëspresidentin e AMD, Jack Huynh, ai foli për teknologjitë grafike të së ardhmes dhe përmendi se është i emocionuar t’i sjellë ato “në një konsolë të ardhshme brenda pak vitesh”.

Kjo deklaratë ka ndezur menjëherë spekulime në komunitetin e lojtarëve, të cilët besojnë se PS6 mund të lansohet në fund të vitit 2028. Ky afat kohor përputhet me ciklin tradicional të konzolave të Sony, që zakonisht zgjasin rreth 7–8 vite.

PlayStation 5, e lansuar në vitin 2020, ka shitur mbi 80.3 milionë njësi deri më sot, duke e bërë atë konsolën më të suksesshme të gjeneratës aktuale. Pas saj, në vitin 2024, u prezantua PS5 Pro, një version më i fuqishëm i gjeneratës së mesme. Megjithatë, lojtarët janë të etur për të parë se çfarë do të sjellë gjenerata e ardhshme.

Ndërkohë, në internet kanë qarkulluar edhe thashetheme për specifikimet e mundshme të PS6, duke përfshirë procesorë Zen 6, grafikë RDNA 5 dhe memorie GDDR7, të cilat do të mundësonin performancë të jashtëzakonshme në 4K dhe përvoja të avancuara me inteligjencë artificiale.

Për momentin, Sony nuk ka dhënë asnjë konfirmim zyrtar për datën e lansimit apo specifikimet, por çdo koment i Cerny-t shihet si një dritare e vogël drejt së ardhmes së PlayStation.

Flaka