Sërish kërcënim me bombë në Tetovë, këtë herë në gjimnaz
Një kërcënim për vendosjen e një mjeti shpërthyes ka shkaktuar shqetësim në Gjimnazin e Tetovës, ku si masë paraprake nxënësit dhe punonjësit e shkollës janë larguar nga objekti.
Sipas informacioneve të siguruara nga Tetova1, pas marrjes së alarmit është ndërprerë procesi mësimor dhe të gjithë të pranishmit kanë dalë jashtë ndërtesës, në pritje të verifikimit të situatës nga organet kompetente.
Autoritetet pritet të kryejnë kontrollet përkatëse për të konstatuar nëse bëhet fjalë për një kërcënim real apo për një alarm të rremë.
Rastet e kërcënimeve me bomba në institucionet arsimore nuk janë të panjohura për Tetovën. Edhe më parë, shkollat në këtë qytet dhe në vendbanime të tjera janë përballur me paralajmërime të ngjashme, të cilat kanë shkaktuar ndërprerje të mësimit dhe evakuime të nxënësve.
Ndërsa disa prej këtyre rasteve janë zbardhur nga organet e rendit, të tjera ende presin epilog institucional. Edhe kërcënimi i fundit, i regjistruar të martën, rikthen shqetësimin për sigurinë në shkolla dhe nevojën që autoritetet të identifikojnë përgjegjësit dhe të parandalojnë përsëritjen e këtyre incidenteve.
Deri në përfundimin e kontrolleve, nuk ka konfirmim zyrtar nëse në objekt është vendosur ndonjë mjet shpërthyes. Flaka














