SHBA alarmohet nga paralajmërimi izraelit: Irani dyshohet se kishte plan për atentat ndaj Trumpit

Tensionet mes Shteteve të Bashkuara dhe Iranit janë rritur pas një paralajmërimi të ri për një kërcënim të mundshëm ndaj presidentit amerikan Donald Trump.

Sipas burimeve të cituara nga CNN, Izraeli i ka dhënë Shteteve të Bashkuara informacione inteligjence për një plan të dyshuar të Iranit për të organizuar një atentat ndaj Trumpit.

Një nga burimet ka deklaruar se paralajmërimi është dhënë gjatë kësaj jave, ndërsa një burim tjetër ka thënë se agjencitë amerikane kishin marrë më herët informacione për diskutime rreth sulmeve të mundshme, por raportimi izraelit lidhej me një komplot specifik.

Detajet e këtij plani nuk janë bërë publike, ndërsa burimet kanë sqaruar se autoritetet amerikane ende nuk e kishin verifikuar informacionin para paralajmërimit nga Izraeli.

Shtetet e Bashkuara prej kohësh kanë paralajmëruar se Irani mund të kërkojë hakmarrje ndaj Trumpit për shkak të sulmit me dron në vitin 2020, ku u vra gjenerali iranian Qasem Soleimani.

Vetë Trump ka deklaruar së fundmi se beson se ai është një objektiv i mundshëm i Iranit. “Ata duan të eliminojnë liderin e SHBA-së – mua”, u shpreh presidenti amerikan para gazetarëve.

Ndërkohë, marrëdhëniet mes Uashingtonit dhe Teheranit mbeten të tensionuara, me kërcënime të ndërsjella dhe përplasje diplomatike, ndërsa vazhdojnë përpjekjet për një marrëveshje bërthamore.

Sipas zyrtarëve amerikanë, agjencitë e inteligjencës po monitorojnë disa aktorë që kanë diskutuar mundësi sulmesh, por deri tani nuk ka të dhëna për një veprim konkret.

Raportimi për kërcënimin ndaj Trumpit vjen në një periudhë të ndjeshme për marrëdhëniet SHBA-Iran, ndërsa Uashingtoni dhe aleatët e tij po përpiqen të menaxhojnë krizën përmes diplomacisë dhe masave të sigurisë.

Flaka