Spotify sjell chatbot-in me inteligjencë artificiale, përdoruesit mund të bisedojnë me platformën

Spotify ka prezantuar një funksion të ri të bazuar në inteligjencën artificiale, i cili synon të ndryshojë mënyrën se si përdoruesit ndërveprojnë me platformën e muzikës.

Veçoria e re sjell një chatbot të integruar me AI, përmes të cilit përdoruesit mund të komunikojnë me Spotify me anë të pyetjeve me zë ose me shkrim, në një mënyrë të ngjashme me asistentët e tjerë inteligjentë.

Funksioni është i vendosur brenda aplikacionit celular, në seksionet Home dhe Now Playing, duke u mundësuar përdoruesve të kërkojnë rekomandime muzikore, të zbulojnë artistë të rinj dhe të marrin më shumë informacion rreth këngëve, podkasteve dhe audiolibrave.

Përveç sugjerimeve, asistenti me inteligjencë artificiale mund të ndihmojë edhe në menaxhimin e përmbajtjeve, si krijimi dhe organizimi i listave të dëgjimit, ruajtja e këngëve, ndjekja e artistëve dhe shtimi i muzikës në radhën e dëgjimit.

Aktualisht, funksioni është në fazën e testimit beta dhe është i disponueshëm në gjuhën angleze për abonentët Premium mbi 18 vjeç në SHBA, Irlandë dhe Suedi, në pajisjet me sistem iOS dhe Android.

Spotify ende nuk ka njoftuar datën e zgjerimit të kësaj veçorie në tregjet e tjera, por pritet që inteligjenca artificiale të luajë një rol gjithnjë e më të madh në mënyrën se si përdoruesit zbulojnë dhe konsumojnë muzikë.

Flaka