Stablecoin-at: arma e re e SHBA për dominimin e dollarit

Stablecoin-et, monedha dixhitale të lidhura me valutë tradicionale si dollari amerikan, po bëhen gjithnjë e më të rëndësishme në financën globale. Fillimisht të përdorura për remitancat e punëtorëve migrantë dhe tregtinë e kriptove, ato sot janë kthyer në një instrument strategjik për ekonominë dhe politikën monetare.

Në SHBA, presidenti Donald Trump firmosi në korrik Genius Act, ligjin e parë federal që rregullon stablecoin-et. Ky ligj kërkon që çdo monedhë e tillë të mbështetet një-për-një me obligacione të Thesarit amerikan, duke garantuar stabilitet dhe njëkohësisht duke gjeneruar kërkesë të re për borxhin publik të SHBA-ve. Vetëm në vitin 2024, Tether bleu mbi 33 miliardë dollarë obligacione, duke u bërë një nga blerësit më të mëdhenj neto të Thesarit.

Ndërkohë, gjigantë financiarë si PayPal, Société Générale, JPMorgan, Bank of America, Citigroup, Goldman Sachs, Western Union, madje edhe Amazon e Walmart po hyjnë fuqishëm në këtë treg. Analistët parashikojnë që deri në vitin 2030 kapitalizimi i stablecoin-eve mund të arrijë në 3.700 miliardë dollarë, sa PBB-ja e Mbretërisë së Bashkuar.

Në Europë, qasja është më konservatore. Rregullorja MiCAR, e hyrë në fuqi në vitin 2024, vendos kushte më të rrepta, si mbajtja e likuiditetit pranë bankave europiane. Por mungesa e një tregu të thellë obligacionesh europiane e bën të vështirë përdorimin e tyre si kolateral. Për këtë arsye, BE po e orienton fokusin drejt euros dixhitale, ndërkohë që monedhat private po fitojnë terren.

Ekspertët theksojnë se stablecoin-et janë një “urë” mes botës së kriptove dhe financës tradicionale, por mbeten sfida serioze për transparencën, stabilitetin financiar dhe sovranitetin monetar.

Flaka