Studenti nga Tirana demanton Bekim Qokun: U mbajtëm 8 orë në kufi me Serbinë, pa ujë e ushqim

Studenti nga Tirana, Veip Kamberaj, ka reaguar publikisht duke kundërshtuar deklaratat e deputetit Bekim Qoku lidhur me ngjarjet e fundit në kufi dhe protestën e studentëve të Jurisprudencës nga Maqedonia e Veriut.

Sipas Kamberajt, realiteti i përjetuar nga studentët ka qenë krejt ndryshe nga ai i paraqitur në një emision televiziv nga deputeti Qoku.

“Ne u mbajtëm për rreth 8 orë në kufi me Serbinë, pa ujë, pa ushqim dhe pa mundësinë për të kryer nevojat personale, në një situatë të papranueshme për këdo, aq më tepër kur shumica ishin vajza. Kjo nuk është interpretim, por një fakt i drejtpërdrejtë”, shkruan ai.

Kamberaj thekson se përpjekjet për ta paraqitur situatën si të menaxhuar ose nën kontroll nuk përputhen me atë që studentët përjetuan në terren. Ai hedh poshtë edhe pretendimet se studentët nuk e dinin arsyen e udhëtimit ose se prania e tyre ishte e politizuar.

Sipas tij, edhe më shqetësues është fakti që deputeti ka qenë i informuar për situatën, por e ka konsideruar atë normale.

Studenti shton se zgjidhja e situatës erdhi vetëm pas ndërhyrjes së Ambasadës së Shqipërisë dhe ambasadorit, të cilët, sipas tij, mundësuan shoqërimin e studentëve drejt ambasadës, në një kohë kur protesta kishte përfunduar prej disa orësh.

“Në momentin kur realiteti që përjetohet nga dhjetëra studentë bie kaq hapur ndesh me atë që thuhet publikisht, nuk kemi më të bëjmë me interpretim, por me një shtrembërim të së vërtetës”, përfundon reagimi i Kamberajt. Gazeta Flaka