Teherani: Lufta me SHBA do të përfshinte gjithë rajonin

Ministri i Jashtëm i Iranit, Abbas Araghchi, ka paralajmëruar se një konflikt i mundshëm me Shtetet e Bashkuara do të ishte “një luftë shkatërrimtare”, duke theksuar megjithatë se Teherani mbetet i interesuar për një zgjidhje diplomatike.

Deklarata e tij vjen në prag të negociatave bërthamore mes Iranit dhe SHBA-së, të cilat pritet të zhvillohen në Geneva. Këto bisedime konsiderohen si një mundësi e fundit për diplomaci, ndërsa tensionet në rajon janë rritur ndjeshëm.

“Nuk do të kishte fitore për askënd, do të ishte një luftë shkatërrimtare”, u shpreh Araghchi në një intervistë për India Today, pak para nisjes për në Zvicër.

Ai paralajmëroi se për shkak të pranisë së bazave amerikane në vende të ndryshme të Lindjes së Mesme, një konflikt i mundshëm do të përfshinte të gjithë rajonin. “Është një skenar shumë i tmerrshëm”, shtoi ai.

Nga ana tjetër, presidenti amerikan Donald Trump kërkon një marrëveshje që do të kufizonte programin bërthamor të Iranit, duke e konsideruar këtë një mundësi për stabilitet, ndërsa Irani përballet me pakënaqësi të brendshme pas protestave të fundit mbarëkombëtare.

Sipas raportimeve, SHBA ka shtuar praninë ushtarake në Lindjen e Mesme, duke grumbulluar avionë dhe anije luftarake për të rritur presionin ndaj Teheranit në prag të negociatave.

Ndërkohë, Irani ka bërë të qartë se synon të vazhdojë pasurimin e uraniumit, pavarësisht dëmtimeve të mëdha që programi i tij bërthamor pësoi pas sulmeve të urdhëruara nga Trump në qershor ndaj tri objekteve bërthamore të Republikës Islamike.

Bisedimet në Gjenevë pritet të jenë vendimtare për të ardhmen e marrëdhënieve mes dy vendeve dhe për stabilitetin e gjithë rajonit.

Flaka