Tërmeti i tretë godet Afganistanin – 17 të lënduar në Kunar

Një tjetër tërmet ka goditur Afganistanin juglindor mbrëmjen e së enjtes, me magnitude 5.6 dhe thellësi të cekët, duke shtuar frikën dhe pasigurinë në zonat tashmë të shkatërruara nga lëkundjet e mëparshme.

Sipas raporteve paraprake, nuk ka viktima nga ky tërmet, por ekipet mjekësore kanë raportuar të paktën 17 persona të lënduar, të cilët janë dërguar në Spitalin Provincial të Kunarit.

Terreni i ashpër malor dhe rrëshqitjet e dheut po pengojnë ndjeshëm punën e ekipeve të shpëtimit dhe shpërndarjen e ndihmave. Qeveria afgane ka bërë të ditur se operacionet po zhvillohen kryesisht me helikopter, pasi shumë rrugë janë të bllokuara.

Ky është tërmeti i tretë pas atij shkatërrimtar të së dielës, më 31 gusht, me magnitude 6.0, që sipas Zyrës së OKB-së për Koordinimin e Çështjeve Humanitare la 1,368 të vdekur dhe 2,180 të lënduar në 25 fshatra. Tërmeti i dytë, të martën, me magnitude 5.5, përkohësisht ndali operacionet e shpëtimit.

Afganistani ndodhet në një zonë me aktivitet të lartë sizmik, në kufirin e pllakat tektonike indiane dhe euroaziatike, dhe shpesh përballet me tërmete të fuqishme. Në vitin 2023, një tërmet me magnitude 6.3 në pjesën perëndimore të vendit mori mbi 1,400 jetë, ndërsa në vitin 2022, një tërmet 5.9 në lindje shkaktoi të paktën 100 viktima dhe rreth 3,000 të lënduar.

Flaka