Trump godet Iranin – Republikanët në dijeni, Demokratët u njoftuan pastaj

Presidenti Donald Trump dhe ekipi i tij kanë qenë në kontakt me udhëheqësit kryesorë republikanë në Kongres përpara se të ndërmerrnin sulmet ndaj objekteve bërthamore iraniane, raprton CNN, transmeton Flaka. Por, sipas burimeve të shumta, demokratët më të lartë nuk janë informuar deri pas përfundimit të sulmeve.

Kryetari i Dhomës së Përfaqësuesve, Mike Johnson, dhe udhëheqësi i shumicës në Senat, John Thune, janë njoftuar paraprakisht për sulmet, sipas disa burimeve nga Partia Republikane.

Ndërkohë, udhëheqësit demokratë – Senatori Chuck Schumer dhe Kongresmeni Hakeem Jeffries – janë njoftuar vetëm pak para se të bëhej publike deklarata e Trumpit dhe pasi sulmet kishin ndodhur. E njëjta gjë vlen edhe për senatorin Mark Warner dhe kongresmenin Jim Himes, që kryesojnë komitetet e inteligjencës në Senat dhe Dhomën e Përfaqësuesve.

Reagimet ndaj sulmeve kanë qenë të ndara në vijat e zakonshme partiake:

Republikanët kanë dalë në mbështetje të Trumpit, duke e quajtur vendimin të drejtë dhe të nevojshëm.

Demokratët, nga ana tjetër, e kanë dënuar vendimin për të ndërmarrë sulme pa aprovimin e Kongresit, duke kërkuar urgjentisht informime të klasifikuara.

Senatori Mark Warner kritikoi ashpër administratën Trump për veprimin pa strategji të qartë, pa konsultim me Kongresin dhe pa transparencë me popullin amerikan.

Senatori Tim Kaine, gjithashtu nga Virginia, konfirmoi se do të shtyjë për një votim të plotë në Senat që riafirmon rolin e Kongresit për të miratuar ndërhyrjet ushtarake.

“Do të kërkoj që të gjithë senatorët të votojnë nëse janë pro këtij luftimi të tretë idiot në Lindjen e Mesme,” tha Kaine.

Senatori demokrat John Fetterman ishte i vetmi që përkrahu hapur sulmet:

“Iranit nuk duhet t’i lejohen kapacitete bërthamore. Ky ishte vendimi i duhur.”

Nga ana tjetër, një grup i vogël republikanësh shprehën skepticizëm, si:

Thomas Massie: “Kjo nuk është kushtetuese.”

Warren Davidson: “Vendimi mund të jetë i drejtë, por është e vështirë të gjesh një arsyetim që është kushtetues.”

Marjorie Taylor Greene, përpara sulmeve: “Ky nuk është lufta jonë. Paqja është përgjigja.” Më pas shtoi lutje për sigurinë e trupave amerikane. Flaka