Vetura përplaset mbi turmën në Munih, lëndohen 28 persona

Një azilkërkues afgan, 24 vjeç, është përplasur me veturë mbi turmën e njerëzve në Munih, duke lënduar 28 persona, disa nga të cilët rëndë.

Policia ka ndaluar drejtuesin e veturës ndërkaq ka thënë se ngjarja duket se nuk ka lidhje me konferencën për siguri që punimet i fillon nesër.

Kryeministri i shtetit të Bavarisë, Markus Soder ka thënë se përplasja e makinës mbi turmën duket se ka qenë sulm.

Sulmuesi, 24 vjeçar me prejardhje nga Afganistani është azilkërkues ndërsa ka qenë i njohur për policinë për vjedhje dhe vepra që lidhen me narkotikë.

Soder ka thënë se janë lënduar 28 persona, disa nga të cilët rëndë.

Sipas dëshmitarëve, në veturën që u përplas mbi turmën ishin dy persona. Policia ka thënë se drejtuesin e makinës e kanë nën kontroll por nuk kanë mundur t’i konfirmojnë raportet për personin e dytë që thuhet se ishte në veturë siç kanë thënë dëshmitarët okular.

Policia ka thënë të mos besojë se ngjarja e sotme ka ndonjë lidhje eventuale me Konferencën për Siguri të Munihut e cila i fillon punimet nesër.

Ende nuk është e qartë nëse drejtuesi i veturës është përplasur qëllimisht mbi turmën apo ka qenë aksident.

E Dieter Reiter, Kryebashkiaku i Munihut ka thënë se në mesin e të lënduarve ka edhe fëmijë.

Mediet lokale kanë raportuar se makina është përplasur mbi anëtarët e sindikatës Verdi të cilët kishin dalë në demonstratë.

Verdi është një bashkësi e 5 sindikatave, e themeluar në vitin 2001, ka 1.9 milion anëtarë dhe është anëtare e Konfederatës së Sindikatave të Gjermanisë.