WhatsApp sjell ndryshimin e madh: Përdoruesit do të mund të fshehin numrin e telefonit

WhatsApp po përgatit një funksion të ri që synon të rrisë privatësinë e përdoruesve, duke u mundësuar atyre të komunikojnë pa zbuluar numrin personal të telefonit.

Platforma e mesazheve do të prezantojë gradualisht mundësinë për krijimin e një emri unik përdoruesi, i cili do të përdoret në vend të numrit të telefonit kur nis biseda me kontakte të reja.

Sipas WhatsApp, kjo veçori do t’u japë përdoruesve më shumë kontroll mbi informacionet personale, pasi ata që zgjedhin një emër përdoruesi nuk do të kenë nevojë t’ua tregojnë numrin e tyre personave të rinj me të cilët komunikojnë.

Emrat e përdoruesve do të jenë opsionalë dhe ata që dëshirojnë do të mund të vazhdojnë ta përdorin WhatsApp-in me numrin e telefonit. Gjithashtu, përdoruesit do të kenë mundësi ta ndryshojnë ose ta heqin emrin e tyre në çdo kohë.

Funksioni i ri do të ketë një kufizim deri në 35 karaktere dhe do të jetë i disponueshëm fillimisht në aplikacionin celular. WhatsApp thekson se numri i telefonit do të vazhdojë të jetë i nevojshëm për krijimin dhe mirëmbajtjen e llogarisë.

Përdoruesit do të njoftohen kur kjo veçori të jetë aktive në llogaritë e tyre, ndërsa opsioni për rezervimin e emrit të përdoruesit do të shfaqet në cilësimet e profilit ose llogarisë.

Flaka