Zelensky: Armëpushim në tokë, det e ajër për 30 ditë – vendim historik në tryezën europiane

Presidenti ukrainas Volodymyr Zelensky ka dhënë detaje të reja mbi një propozim për armëpushim 30-ditor, të dakorduar me liderët e Britanisë së Madhe, Francës, Gjermanisë dhe Polonisë, transmeton Flaka

Sipas Zelenskyt, propozimi parasheh një armëpushim të plotë dhe të pakushtëzuar që do të hyjë në fuqi të hënën, më 12 maj, dhe do të zbatohet “në tokë, në ajër dhe në det”. Ai theksoi se zbatimi i tij është “plotësisht i realizueshëm”, veçanërisht në bashkëpunim të ngushtë me Shtetet e Bashkuara të Amerikës.

“Ne ndajmë një qëndrim të përbashkët me partnerët tanë: nevojitet një armëpushim i menjëhershëm, i plotë dhe i pakushtëzuar për të paktën 30 ditë. Ne propozojmë që të fillojë të hënën, më 12 maj. Presim përgjigjen e Rusisë,” deklaroi Zelensky.

Gjatë kësaj periudhe, sipas tij, duhet të nisin bisedime të strukturuara mbi bazat e sigurisë, aspektet politike dhe çështjet humanitare që lidhen me paqen e qëndrueshme në Ukrainë.

Presidenti ukrainas paralajmëroi gjithashtu se, nëse Rusia refuzon të pranojë armëpushimin, partnerët ndërkombëtarë janë të gatshëm të vendosin një paketë të re sanksionesh, kryesisht në sektorin energjetik dhe financiar rus. Ai konfirmoi se Bashkimi Evropian, në bashkëpunim me Britaninë, SHBA-në dhe Norvegjinë, tashmë po përgatit këtë paketë.

Zelensky theksoi gjithashtu se një prioritet mbetet forcimi i kapaciteteve të mbrojtjes së Ukrainës, si garanci për ruajtjen e sovranitetit dhe sigurisë kombëtare.

Aktualisht, Kievi dhe aleatët perëndimorë janë në pritje të reagimit zyrtar të Kremlinit lidhur me propozimin për ndalim të luftimeve. Flaka Media