Mono-manifestimi: 35 vjet shtet, por mentaliteti i vjetër ende feston

Analisti politik Sefer Selimi ka reaguar ndaj mënyrës se si janë organizuar aktivitetet shtetërore për shënimin e 35-vjetorit të pavarësisë së Maqedonisë së Veriut, duke e cilësuar mungesën e gjuhës shqipe dhe përfaqësimit shqiptar si dëshmi se vendi ende nuk është shkëputur nga mentaliteti i së kaluarës.

Selimi thotë se, pavarësisht se bëhet fjalë për një shtet që pretendon të jetë multietnik, aktivitetet festive shtetërore janë zhvilluar pa gjuhën shqipe dhe pa përfshirjen e shqiptarëve në programet kulturore.

Reagimi vjen një ditë pasi Flaka raportoi për spektaklin qendror në Shkup, ku morën pjesë dhjetëra artistë maqedonas, ndërsa nuk pati asnjë përfaqësues shqiptar në skenë.

Sipas Selimit, kjo krijon një paradoks: shteti ka festuar 35-vjetorin e pavarësisë, por në të njëjtën kohë ka lënë jashtë një pjesë të konsiderueshme të qytetarëve të tij.

“Mund të na fshijnë nga skena, nga programi, nga ekrani dhe nga protokolli. Por nuk mund të na fshijnë nga realiteti.”

Ai argumenton se shqiptarët kanë qenë pjesë e pandashme e historisë së vendit dhe se kontributi i tyre nuk mund të anashkalohet përmes ceremonive, koncerteve apo programeve shtetërore.

Në fund, Selimi e zgjeron kritikën përtej një koncerti të vetëm, duke kërkuar që shteti të çlirohet nga ideja se i përket vetëm njërit prej popujve që jetojnë në të.

“35 vjet pas pavarësisë, ka ardhur koha që ky shtet të çlirohet edhe nga ideja se i përket vetëm njërit prej popujve që jetojnë në të”, shprehet ai. Gazeta Flaka