Times Square bëhet skenë për UÇK-në: “Freedom for the Liberators” më 7 shtator

Mesazhi “Freedom for the Liberators” do të shfaqet më 7 shtator në ekranet e Times Square në New York, në prag të verdiktit për ish-krerët e Ushtrisë Çlirimtare të Kosovës (UÇK) në Hagë.

Nismën e ka bërë të ditur veprimtari i diasporës shqiptare në SHBA, Shpend Gjocaj, i cili ka publikuar edhe konfirmimin nga “Welcome to Times Square”.

Sipas njoftimit, grafika do të shfaqet 15 deri në 30 sekonda në çdo orë gjatë 7 shtatorit, duke e kthyer një prej shesheve më të njohura të New Yorkut në një hapësirë simbolike të mbështetjes për ish-krerët e UÇK-së.

Mobilizimi nuk është i kufizuar vetëm në SHBA. Në Kosovë, më 12 shtator në orën 14:00, është paralajmëruar “Marshi për Liri”, i cili do të nisë nga sheshi “Skënderbeu” në Prishtinë.

Ndërkohë, platforma “Liria ka Emër” ka nisur nismën mbarëkombëtare “Kosova po pret”, me aktivitete të ndryshme në Kosovë. Në kuadër të saj janë organizuar edhe “Netët e Lirisë”, me ndezjen e zjarreve simbolike në shtatë zonat operative të dikurshme të UÇK-së, si dhe vendosjen e flamujve kombëtarë dhe emblemës së UÇK-së.

Më 5 shtator, “Zjarri i Lirisë” u ndez në Llap, në praninë e ish-komandantëve dhe veteranëve, ndërsa për mbrëmjen e 6 shtatorit është paralajmëruar tubim në Kompleksin Memorial “Dëshmorët e Kombit” në Gllogjan.

Mobilizimi pritet të vazhdojë edhe në Hagë. Sipas planit të publikuar, mbështetësit do të mblidhen atje nga ora 22:00 e 15 shtatorit dhe do të qëndrojnë deri në fillimin e seancës më 16 shtator, kur pritet shpallja e verdiktit.

Nga Times Square te Prishtina e deri në Hagë, mbështetësit po organizojnë një seri aktivitetesh në prag të vendimit gjyqësor. Gazeta Flaka