VMRO-DPMNE kërkon përgjegjësi penale për Filipçen dhe partnerët e tij: Akuzohen për “sabotim të sistemit bankar”

Deputeti dhe zëvendëssekretari i përgjithshëm i VMRO-DPMNE-së, Brane Petrushevski, ka akuzuar Venko Filipçen dhe partnerët e tij nga LSDM-ja për përhapje të, siç i cilësoi, dezinformatave dhe manipulimeve lidhur me rastin e Alta Bankës. Ai i bëri thirrje Prokurorisë Publike të veprojë dhe të ftojë në bisedë informative personat që, sipas tij, po tentojnë të destabilizojnë sistemin bankar dhe rendin kushtetues.

VMRO-DPMNE ka kërkuar hetim dhe përgjegjësi penale ndaj Venko Filipçes dhe partnerëve të tij politikë nga LSDM-ja, duke i akuzuar për përhapje të informacioneve të pavërteta lidhur me rastin e Alta Bankës.

Në një konferencë për media, Brane Petrushevski, deputet dhe zëvendëssekretar i përgjithshëm i VMRO-DPMNE-së, deklaroi se Filipçe dhe bashkëpunëtorët e tij po përhapin, sipas tij, gënjeshtra dhe manipulime për një rast që ekziston në një shtet tjetër, por jo në Maqedoninë e Veriut.

“Filipçe dhe partnerët e tij, me vetëdije përhapin gënjeshtra dhe manipulime për rastin me Alta Bankën, rast i cili ekziston në një shtet tjetër, por jo edhe në Maqedoni”, deklaroi Petrushevski.

Ai akuzoi opozitën se po përpiqet të bartë në Maqedoninë e Veriut pamjet dhe tensionet nga trazirat në vende të tjera, por vlerësoi se qytetarët, sipas tij, e njohin stabilitetin në vend.

Petrushevski ngriti gjithashtu pyetje lidhur me interesat që, sipas tij, mund të fshihen pas qëndrimeve të LSDM-së për Alta Bankën.

“Pse Filipçe dhe LSDM-ja janë kaq të zëshëm për Alta Bankën? A po pret ndonjë biznesmen i afërt me Zaevin që ta blejë bankën me çmim simbolik? Përndryshe, pse do të dëshironte LSDM-ja që të falimentojë ndonjë bankë, sipas stilit të Eurostandardit?”, tha ai.

Në fund, përfaqësuesi i VMRO-DPMNE-së i bëri thirrje Prokurorisë Publike që të ndërmarrë veprime pas informacioneve të bëra publike.

“E ftojmë Prokurorinë Publike të veprojë sipas detyrës zyrtare dhe t’i ftojë në bisedë informative të gjithë ata që përpiqen ta rrënojnë rendin kushtetues të shtetit”, deklaroi Petrushevski. Gazeta Flaka

22

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

16

Jo, nuk mendoj.

6

Nuk ka arsye për të protestuar.

0