Granatimi rus dëmton kishën më të vjetër ortodokse në qytetin ukrainas Slovjansk

Granatimi rus ka dëmtuar kishën ortodokse „Ngjallja e Krishtit“ në qytetin Slovjansk, në rajonin e Donjeckut të Ukrainës. Bëhet fjalë për objektin më të vjetër kishtar në qytet, i cili ka rëndësi të veçantë për trashëgiminë historike dhe shpirtërore të tij.

Për dëmet e shkaktuara më 4 nëntor njoftoi Departamenti Informativ dhe Edukativ i Kishës Ortodokse të Ukrainës (UPK), duke bërë të ditur se në tempull janë thyer dritaret, ndërsa hapësira e brendshme është mbuluar me mbetje nga pjesët e dëmtuara.

Si pasojë e goditjes, llambadari i madh i kishës ka rënë mbi altarin. Dëmtime kanë pësuar edhe afresket kishtare dhe fasada e objektit.

Sipas informacioneve të publikuara nga UPK-ja, kisha e parë prej druri në këtë lokacion ishte ndërtuar në vitin 1775. Në shekullin XIX, në vend të saj u ngrit një tempull prej guri, i kushtuar Ngjalljes së Krishtit.

Deri më tani nuk është bërë e ditur se kur ka ndodhur saktësisht sulmi, ndërsa nuk ka informacione nëse ka persona të lënduar nga komuniteti kishtar.

Dëmtimi i tempullit në Slovjansk është një tjetër rast i dëmtimit të objekteve fetare gjatë luftës së Rusisë kundër Ukrainës. Sulmet ndaj kishave dhe objekteve të tjera fetare shkaktojnë shqetësim jo vetëm për shkak të dëmeve materiale, por edhe për shkak të rrezikut që i kanoset trashëgimisë historike dhe shpirtërore të komuniteteve lokale.

Edhe pse lufta në Ukrainë po vazhdon prej më shumë se katër vjetësh, objektet fetare dhe komunitetet kishtare vazhdojnë të jenë të ekspozuara ndaj rrezikut nga veprimet ushtarake. Gazeta Flaka

14

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

12

Jo, nuk mendoj.

2

Nuk ka arsye për të protestuar.

0