Mbrojtja e shkabës egjiptiane, MED përfshihet në projektin pesëvjeçar ndërkombëtar

Shoqata Ekologjike e Maqedonisë (MED) do të marrë pjesë gjatë pesë viteve të ardhshme në projektin ndërkombëtar „Rikthimi i sigurt i shkabës egjiptiane“ (LIFE EV Safe Return), i bashkëfinancuar nga programi LIFE i Bashkimit Evropian.

Projekti, i koordinuar nga Shoqata Bullgare për Mbrojtjen e Shpendëve, përfshin 15 institucione dhe organizata partnere nga Evropa, Lindja e Mesme dhe Afrika. Qëllimi është mbrojtja e vendeve të folezimit, rrugëve të migrimit dhe zonave të dimërimit të shkabës egjiptiane (Neophron percnopterus), e njohur në vendin tonë edhe si kanja.

Kjo specie e rrezikuar çdo vjeshtë përshkon më shumë se 5.000 kilometra nga Ballkani drejt Afrikës, duke u përballur me rreziqe si helmimi, gjuetia e paligjshme dhe goditjet elektrike nga linjat e pasigurta të energjisë.

Në Maqedoninë e Veriut janë regjistruar rreth 10 çifte folezuese, të cilat gjenden në Grykën e Demir Kapisë, rajonin e Tikveshit, Mariovë dhe luginën e Bregallnicës. Në nivel të Ballkanit, në Maqedoninë e Veriut, Bullgari, Greqi dhe Shqipëri janë evidentuar gjithsej rreth 50 çifte folezuese.

„Si organizatë partnere në projekt, MED do të monitorojë numrin e kanjave në Maqedoni, do të punojë për identifikimin dhe eliminimin e kërcënimeve të drejtpërdrejta, si dhe do të forcojë bashkëpunimin me popullsinë lokale dhe përfshirjen e saj në përpjekjet për mbrojtje“, deklaroi Metodija Velevski, ornitolog dhe drejtor i programeve në MED.

Aktivitetet do të përqendrohen në parandalimin e helmimit dhe gjuetisë së paligjshme, zvogëlimin e rrezikut nga goditjet elektrike dhe sigurimin e burimeve të sigurta të ushqimit. Në Bullgari dhe Greqi, të paktën 40 shkaba egjiptiane, të rritura në kopshte zoologjike ose të shpëtuara nga natyra, do të lëshohen në habitatet e tyre dhe do të monitorohen përmes transmetuesve GPS.

Projekti parasheh edhe bashkëpunim me komunitetet lokale, blegtorët, gjuetarët dhe veterinerët, si dhe programe edukative në pesë vende, të cilat do të përfshijnë mbi 4.000 nxënës, mësimdhënës dhe të rinj të angazhuar në mbrojtjen e natyrës.

Pjesëmarrja e MED-it plotëson aktivitetet e deritanishme për mbrojtjen e kësaj specie, përfshirë projektet „BalkanDetox“ dhe „Egyptian Vulture New LIFE“, si dhe iniciativën „Tela të sigurta për shpendët e rrezikuar“, përmes së cilës punohet në zvogëlimin e rrezikut nga goditjet elektrike dhe përplasjet me infrastrukturën energjetike.

14

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

12

Jo, nuk mendoj.

2

Nuk ka arsye për të protestuar.

0