Hovenier përmend sërish veprimet e Kurtit që ndikuan në kualitetin e marrëdhënieve Kosovë – SHBA

Ambasadori i Shteteve të Bashkuara të Amerikës (SHBA) në Prishtinë, Jeffrey Hovenier, në një konferencë për shtyp të mërkurën, ka përsëritur se SHBA-ja është sfiduar disa herë nga veprimet e kryeministrit kosovar, Albin Kurti, që kanë ndikuar në cilësinë e marrëdhënieve mes SHBA-së dhe Kosovës.

Megjithatë, pas marrëveshjes ndërmjet Kosovës dhe Agjencisë Amerikane për Zhvillim Ndërkombëtar (USAID) në vlerë prej 34.5 milionë dollarë, ai ka shtuar se përkrahja amerikane për popullin e Kosovës do të vazhdojë sepse ajo nuk vjen si rezultat i politikave apo veprimeve të një qeverie të caktuar.

“Ky përkushtim ndaj popullit të Kosovës nuk zbatohet domosdoshmërisht rreth ndonjë qeverie të caktuar, apo të ndonjë zgjedhjeje apo veprimi të caktuar të politikës qeveritare”, ka deklaruar ambasadori Hovenier, derisa i ka bërë thirrje Qeverisë së Kosovës që t’i kthehet angazhimit konstruktiv.

“Shumë prej jush i keni parë raportimet në media për dallimet e SHBA-së dhe anëtarëve të tjerë të bashkësisë ndërkombëtare me Qeverinë e Kosovës për disa veprime që janë ndërmarrë nga qeveria aktuale e kryeministrit Kurti. Jemi duke u përballur me disa sfida me qeverinë aktuale të Kosovës të cilat kanë ndikuar në cilësinë e partneritetit tonë”, ka shtuar mes tjerash ai.