Epidemia nga kolla e keqe nuk qetësohet

Një valë e re e infeksioneve të kollës së keqe. Nëse prej disa javësh ka pasur një rënie të rasteve të reja të diagnostikuara, në shtatë ditët e fundit numri i rasteve të kollës së keqe është trefishuar në krahasim me raportin e mëparshëm të Institutit të Shëndetit Publik, përcjell FLAKA.

Nga 44 pacientë që janë konfirmuar në periudhën 10-16 maj, pacienti më i vogël është foshnja tre muajshe dhe më i madhi 77 vjeç. Rreth 39 janë në Shkup, 4 në Kumanovë dhe një në Prilep.

Pavarësisht apeleve të mjekëve, në vend janë ende mbi 10 mijë fëmijë që nuk janë imunizuar plotësisht me DiTePer. Shumë prej tyre kanë marrë doza të humbura në mënyrë që të mund të shkojnë në kopshtin e fëmijëve, por shumë nuk i kanë mbushur ende boshllëqet në kalendarin e imunizimit.

Që mbulimi me vaksinim nuk është i kënaqshëm, tregojnë edhe shifrat e mbi 590 rasteve të konfirmuara të kollës së keqe deri më tani. Prej tyre, më shumë se 60 për qind nuk janë plotësisht të mbrojtur nga pertusis.

Përveç Shkupit ku u shpall epidemi në shkurt dhe Kumanovë që nga fillimi i prillit, kolla e keqe është ende e pranishme në 17 qytete të tjera.

Ndërkohë, ekziston një vaksinë e kollës së keqe për të rriturit që mjekët rekomandojnë veçanërisht për gratë shtatzëna në tremujorin e tretë. Por deri më tani vetëm 10 doza DiTePer janë aplikuar për gratë shtatzëna në Qendrën për shëndet publik në Shkup. FLAKA